لەوساوە کە شاری سلێمانی دروست کرا
لە کتێبی:
دیوانی پیرەمێرد
بەرهەمی:
پیرەمێرد (1867-1950)
1 خولەک
579 بینین
لەوساوە کە شاری سلێمانی دروست کرا
کوشتاری ئێمە بوو بە شەڕی دوو برا
ساڵێک بە توورەکانە بە ماڵ و مناڵەوە
ئەژیاین بەڕیزە، ڕیزکەری کەوش بووین لە ماڵەوە
دیواربڕێک بە دزییەوە گەسکی لە ماڵ ئەداین
شەو خەنجەرێک بە دزییەوە باوکی لە چاڵ ئەناین
سەرمایەی توجارێکی پێشوو مەعاشێکی ئێستە بوو
ترسێکی وای بوو کێ خەوی ئێستای لە چاو ئەچوو؟
ئەمن و ئاسایش و نیعمەت و سەیرانی ئێستەکە
توخوا بە ناشوکری مەیبڕە و سپڵەیی مەکە
با وەکوو ئەوانەی ژووروو نەخنکێین بە دارەوە
با دانەهێنرێین بە تەڕی بە پۆپەی مشارەوە
قەیوان و قوترە و کونەماسی لە دەست نەدەین
دوایی بە جرت و فرتەوە هانا بۆ کێ ئەبەین