بە ناوی «کوێخاڕەمەزانی ورمزیاری»

لە کتێبی:
دیوانی پیرەمێرد
بەرهەمی:
پیرەمێرد (1867-1950)
 1 خولەک  472 بینین
کۆترە باریکە، کۆترە باریکە
هۆی هۆی چیتە بەم شەوە تاریکە
بۆچ توش وەک ئێمە لانەت شێواوە؟
ڕێگای ژیانت لێ بەستراوە؟
وا بێچووەکانت گرتۆتە سەرباڵ
لە ترسی ڕاوکەر ئەفڕیت یاڵەویاڵ
من قەڵای شادیم دەوری گیراوە
دەرگای ژیانم لێ هەڵچنراوە
لە دەست ڕەمەزان هەڵهاتم بە تاو
وتم وا جەژنی عالەم دێتە ناو
لەگەڵ ئاوەڵان تێر پڵاو ئەخۆم
تێر کەسوکارم ئەبینم بۆ خۆم
کەچی لە کەچی بەخت و ئێقباڵم
نەحەسامەوە هاوار بە ماڵم
ئێستاش هیوای من تەنها بە خوایە
ئایەتە: عوسر، یوسری لە دوایە
من لە پاکی خۆم هێندە ئەمینم
لە خۆما سووچ و گوناهـ نابینم
دار و فەلاقەی باوکم لاخۆشە
بەڵام غەرەزکار بۆچ لێم بەجۆشە
بۆ سەرداری خەڵک من ئەچمە سەر دار
کورسی و پەت بۆ من، کورسی بۆ سەردار
باوکم منداڵی بێعاری دەبێ
بێزاری نابێ ئازاری دەبێ
مناڵ زینەتی ماڵی باوکە
بۆ ڕێی لێقەومان وەک چراوکە
بە فیتنەی بەدکار لێک نابینەوە
کەوتینە تەنگانە ئاشت ئەبینەوە