بە ڕووپۆشینی تۆ ڕۆژم شەوەزەنگێکە تیرە و تار

لە کتێبی:
دیوانی پیرەمێرد
بەرهەمی:
پیرەمێرد (1867-1950)
 2 خولەک  661 بینین
ئەم هەڵبەستەی خوارەوەی پیرەمێرد یەکێکە لەو هەڵبەستانەی کە تیایا پێڕەوی شیعرەکانی «شاە مظهرکەس»ی کردووە کە یەکێک بووە لە شاعیرە بەرزەکانی فارس.
بە ڕووپۆشینی تۆ ڕۆژم شەوەزەنگێکە تیرە و تار
وەکوو تاوس کە هەوری دی ئەناڵێنێ بە گریە و زار
پەچەت ڕوخساری داپۆشیت و من دەردم گرانتر بوو
بەڵێ دیارە کە ڕۆژ ئاوا بوو دەردی قورس ئەبێ بیمار
ڕەگی ڕۆحم بە دیدەی تۆوە پەیوەستە و بە سەربەستی
بەسەد لادا تەراندت ناپسێ سەختە وەکوو بزمار
لە دەوری بێستووندا شەو کە دەنگێکی بە سۆز ئەبیەی
ئەوە گیانی منە بۆ بێکەسیی فەرهاد ئەکا هاوار
لە دوجەیلا، کە ناقەی مەحمەلێکم دی ئەڵێم لەیلە
بەرەو پیری ئەچم، ئەشعاری قەیسی بۆ ئەکەم تکرار
لەجێی قەیدی عەقڵ زنجیری شێتیم هێندە لا خۆشە
لەگەڵ جووڵام زڕەی زنجیرەکەم پڕ کات دەر و دیوار
ئەگەر شێتی تەواو شێت بی، لە لایان هێندە ماقووڵی
بەری پێت ماچ ئەکەن دڕکی بیابان و سوپاهی خار
بە پەنجەی نازکی دولبەر، تەلی بێ گیان ئەناڵێنێ
منی زیندوو بە دەنگی چۆن نەکەم شۆری جنوون ئیزهار
ئەمانە شیعری مۆدەی کۆنە وەک من پیر بووە ئێستا
نەشیدت بۆ وەتەن بێ باشە بەڵکوو پێی ببی ڕزگار
هەموو عالەم لە دووی ئازادی وێڵە بۆچی من وەک شێت
کەمەندی زوڵف لە ئەستۆی خۆم خەم و ببمە کەری ژێر بار