یار شێوەی چۆنە؟
لە کتێبی:
دیوانی پیرەمێرد
بەرهەمی:
پیرەمێرد (1867-1950)
2 خولەک
886 بینین
یار شێوەی چۆنە، یار شێوەی چۆنە؟
بێ چاوێنی بێ، یار شێوەی چۆنە؟
بڕۆ ماڵی جیم چاوخانەی نوونە
گۆلنکەی پووشین کلابتونە
کارخانەی دەستی خودای سروشتە
لە بەشەر ناکا حۆری بەهەشتە
هەرچەند لە نەسڵی دایکە حەوایە
بەڵام نموونەی دەستی خوایە
ئافەریدەی سونع، بێ هاوتای ئیزەد
دوور بێ لە کاری چاوەزاری بەد
جڵوەی جەدوەلی چاوی سورمەڕێژ
چاوی ئاسکی کردووە گێژ و وێژ
برژانگ سیافام بە سورمەی کۆی توور
بە تیری نیگای دڵ خانەی زەنبوور
ڕووی سفیدەی سبح، بە شەفەق قرمز
شیرینتر لە ڕووی شیرینی هورمز
لووت تەڵای خوسرەو قاڵی نەوجەلا
زمڕوت بەند بووە لە گۆشەی تەڵا
هەناسەی دەوای دڵەی پڕ خەمە
بە ئەموستیلە ناوی خاتەمە
دوو پەڕەی گوڵنار ناوی ناوە لێو
ماچێکی لێوی شێخ ئەخاتە کێو
سی و دوو ددانی دانەی مرواری
لە قوتووی لەعلا حەڵوا دەباری
لە هەر چوارلاوە یاقووت تەنیویە
یاقوت یا قووتی گیانە کێ دیویە؟
چەناگەی زیوی سپی خاڵ بێ خاڵ
کۆی غەبغەب مینای پاکتاوی زوڵاڵ
گەردن گەردنی ئاسکی خوتەن گێڵ
یا گەردنی قاز دەلیلەی ڕەوێڵ
چاڵی تینوێتی ئاوی حەیاتە
قەترەی ئارەقی دوایی مەماتە
قۆڵ بە بازیبەند دانەی لاڵەوە
پەنجە بە ڕەنگی خەنەی ئاڵەوە
سنگ تەختەی عاجی شەترەنجی شاهان
شاماتی و شاهان ئەخاتە ئامان
دوو سێو لەو سنگە تەلیسم بەندە
کەس نەیزانیوە بەهای سێو چەندە
لەوە بەرەوخوار بۆ کەس نەبینرا
پەردەی ئەدەبی بە سەرا کێشرا