لە گوێم دێ دەنگی لایلایەی وەتەن، دایک جگەرسووتاو

لە کتێبی:
دیوانی پیرەمێرد
بەرهەمی:
پیرەمێرد (1867-1950)
 2 خولەک  1331 بینین
لە گوێم دێ دەنگی لایلایەی وەتەن، دایک جگەرسووتاو
ئەڕێژێنێ بە سەر وێرانەکەی خوێناویا خوێناو
ئەلاوێنێتەوە و ئەگری، سەری شینە لە ماتەمدا
شەو و ڕۆژ کۆتەڵی منداڵەکانە وا لەبەردەمدا
ئەڵێ: لەو گەردشەی کوردا، کوڕی چاکم هەبوو کوژران
ئەوەش مابوو هەموو مردن، لە برسا بێ کفن نێژران
خودا پاداشی ئەم تەنگانەیەی وا دایەوە و وام دی
بەپێی خوی هاتە بەرپێم تاجی گەوهەردارەکەی کوردی
سەلاحەدین جەلالی وای نەبوو تاریخ لەبەرچاوە
هەموو پاشای بەبان مردن بە حەسرەت ڕۆژێکی واوە
شەوێ دەس ئەهرەمەن کەوت خاتەمی مڵکی سلێمانی
کەچی میر و گزیری پێ ئەکرد، قەدری وەها زانی
بەدەم ئەم ناڵەوە، دەستی درێژ کرد، خستیە سەر شانم
وتی: تۆفیق هاتیتەوە، بۆ باری میحنەت، ئەیزانم
بەڵێ حاڵم پەشێواوە، فڕندە باڵی سووتانووم
نەما غەیری کەلاوە، شەو، بناڵێنە لەوێ وەک بووم
وتم: دایە، کە دایکم مرد! نەگریام، چونکە تۆ ماوی
ئەگەر ئەولادەکانیشت بکوژرێن، تۆ دەبێ چا بی
قەسەم بەو عەزمی کوردەی شانی «ریچاردکەس»ی بە شیر ڕووشان
کڵاوی کورد ئەبێ قووچ بێ کە هات و شانی خۆی جووڵان
شەوێ پیاوێک لە بەفرا ما، نەمرد ئاگرێکی دووری دی
لە لای من نائومێدی کفرە، ئەم ئاگرەی دڵم بۆ کێ