بورجی ڕۆژی کورد

لە کتێبی:
دیوانی پیرەمێرد
بەرهەمی:
پیرەمێرد (1867-1950)
 1 خولەک  1715 بینین
بورجی ڕۆژی کورد کە ڕۆژهەڵات بوو
هەلمان هەڵنەکەوت بەشمان هەڵات بوو
قافیەی ئەکراد هەر بەدنیهاد بوو
بوومی شووم لە شوێن بووممان دڵشاد بوو
سەرچاوەی دجلە لە دیاربەکرا
هێند خوێنی کوردی تێکەڵ ئەکرا
وەک ئەرخەوان سوور ئەبوو بە لافاو
پیرێژنی چەرخ ئەیکرد بە سووراو
هەتا خوا وای کرد ڕۆژ گەڕایەوە
دادی هەژاران پرسرایەوە
لە ڕۆژئاواوە ڕۆژمان بۆ هەڵات
غوولی مەغوولی بیابان هەڵات
ئەڵێن کاتێک ڕۆژ ئەگەڕێتەوە
دەوری زۆرداری ئەبڕێتەوە
ئەبێت بە دەوری مەهدی سەرزەوی
لە سەر ئایەتی «خاتم النبیعەرەبی»
پەیڕەوی «نبی» دیموکراتییە
دیموکراتییە ڕوو لە هاتییە
من باوەڕم کرد کە ئەم ئایینە
ئاوێنەیە بۆ کوردی ساف سینە
من سوێندخوارانم بۆیە خۆش ئەوێ
ئەمجارە فریای ئێمەش ئەکەوێ
ئەگینە من خۆم لەکێ دادمە
نان و کەبابێک سەر و زیادمە
مایەی ژیانی ئێمە کە با بێ
بۆ نەیگۆڕمەوە من بە کەبابێ