آگاهی سلطان مجاز از آمدن لشکر عقل و عشق

لە کتێبی:
کۆمەڵەی شیعری فەقێ قادری هەمەوەند
بەرهەمی:
فەقێ قادری هەمەوەند (1830-1890)
 2 خولەک  524 بینین
جاسووسان کار مەحافیزەی حودوود
پەی خدێو شەرع خەبەر بەردن زوود
عەرز کەردن بە شا سوپای بێ شومار
جە تەریق حەق پەی موڵک یەسار
ئامان بە حودوود جە فڵان چەشمە
وەبێ خەوف و بیم هۆرداشان خەیمە
چون مور و مەلەخ مەنمانۆ سوپا
سوپەهـ سالارەن دوو ساحێب کولا
مەجاز و ئیبلیس لەووامەی شەڕڕاڕ
بەستن ئەنجومەن پەی تەدبیر کار
بە ئەفکار ڕەئی هەرسێ مەککارە
تەحریر دان عەرزە پەی شای ئەممارە
جە موڵک دووەم سییەم دوو سەردار
هەردوو چەنیشەن سوپای بێ شومار
ئەڵبەت جە سوڵتان ڕۆحەن ئەی سوپا
جە حودوود شەرع سازان خەیمەگا
بە وروود عەرزە سوپای بێ سامان
پەرێ ئیحتیات حازر کەر هەر ئان
هەر وەقت لزووم کەرد مەکیانم خەبەر
پەرێ ئیمدادی ڕەوان کەر لەشکەر
تەمام بی عەرزەی واقیعەی ئەخبار
«تمهیراعەرەبی» تەحریر داشان بە چاپار
چاپار بە ڕای وێش تەعجیل کەرد گوزەر
بە هەر تەرەفدا کیانان خەبەر
بە هەر مەرز و بووم ئیقلیماتەوە
بە ئیل و ئەحشام سەربیساتەوە
هەی بەیان، نەبەرد پولەنگ و شیرەن
جاڕ غیرەتەن، حیفز ئەسیرەن
ها سوڵتان ڕۆح کیانان لەشکەر
تا موڵک و میللەت کەرۆ موسەخخەر
یاوا بە هەرجا ئەمر مەجازی
هەرکەس پەی سەفەر کەردش کارسازی
شوعلەی شەمس نە موڵک مەغریب کەرد نزوول
سوپای زەنگ بەرز کەرد دەبدەبەی دەهوول
ئەسەر کەرد دارووی جە لەیل لیباس
بێ هۆش بین جە خەو زومرەی «عامّ الناسعەرەبی»
سەحەرگەهـ سوڵتان مەجاز نیشت نە تەخت
ئەمرش کەرد سوپا بە تەعجیل و جەخت
سوپای ماوجوودە هەرچی هەن تەمام
جە کەنار شەهر وەپا کەن خیام
سوڵتان وێش چەنی موجوودەی سوپا
جە کەناریەی شەهر سازا ئۆردووگا!
سوپای دوو ئیقلیم بە وەعدەی چل شەو
ئامان بە حوزوور شەهەنشاهـ نەو