در بیان اقلیم دوم اسمش حقیقت و خدیوش عشق است
لە کتێبی:
کۆمەڵەی شیعری فەقێ قادری هەمەوەند
بەرهەمی:
فەقێ قادری هەمەوەند (1830-1890)
2 خولەک
735 بینین
ئیقلیم دووەم موڵکش عەزیمەن
ئیسمش حەقیقەت پڕ خەوف و بیمەن
یەک شەهر عەزیم نەوجا مەشهوورەن
ئیسمش تەوەککول قاپیی سروورەن
شەوق و زەوق و وەجد، سیدق و سەخاوەت
سوکر و سەهم و سیڕ، بوکا و شەجاعەت
یەکسەر قەسەبە و قەزان جەو مەکان
مەعموورەش پڕ زەرع، سوپاش بێ سامان
تەوەککول مەرکەز عیشق حەقیقەن
عەدوو جە دەریای فیکرش غەریقەن
عالی مەقامەن، ئەسڵش ئاتەشەن
بەحر بێ پەیەن، باد سەرکەشەن
سەیحەش ساعیقەی بەرق لامیعەن
تێغش چون قەزای موبرەم قاتیعەن
سەردار سوپای زەڕڕین کولاهەن
جیهان پەهلەوان، پایتەخت شاهەن
بە فەرمان ڕۆح ئەو شێر دیژەم
شەهریاریشەن جە موڵک دووەم
جە تەخت خلووس مەست و مەغروورەن
فەرقش درەخشان تاج حوزوورەن
هومایوون فالەن، کەنز حیکمەتەن
شێر غوڕڕانەن، عەنقا سیفەتەن
سیمورغەن جە قاف قەزای یەگانە
دارۆ جە مەقام عەرش ئاشیانە
چون فەقر و فاقەش کەردەن بە یاوەر
درەختش جە شاخ تەوحید پڕ سەمەر
هەم عیشقەن توفەیل شەهەنشای ڕۆحەن
هەم قاپیی میعراج جە عیشق مەفتووحەن
هەم سۆزەی عیشقەن زەمزەمەی داوود
بەخشا حەلاوەت بە موڵک وجوود
هەم عیشق بی خەلیل خەڵاس کەرد جە نار
مەسیح یاونا بە چەرخ دەووار
هەم عیشق خەڵاس کەرد یوونس و ئەییووب
بە عیشق ڕەوشەن بی بیناییی یەعقووب
موحەممەد جە عیشق سازا نەردەبان
سەحرای لامەکان تەی کەرد وە بێ ئان
عیشق بی جە مەنسوور مەکەرد «انا الحقعەرەبی»
کوفر زولەیخاش بە نوور کەرد مولحەق
جە عیشق مەوجوود بی غەوغای دوو جیهان
مەعرەکەی مەحشەر، جەحیم و جینان
زەڕڕەیێ جە پڕتەو عیشق بی جە مەجنوون
هەم عیشق بی شەق کەرد سینەی بێستوون
بەحر عیشقەن عیلم ئەنبیای مورسەل
قەترەی عیشقەن حیلم ئەولیای ئەکمەل
نەبی شەهر عیلم وەلی دەرگاهەن
مەزهەر خورشید مەشعەلەی ماهەن
عەرز کەردم عیشق غەوغای دوو جیهان
لازم کەرد ئیسبات ئەسڵش کەم بەیان