گریانی خاتوون بە دیتنی نامەی نەسرینی
لە کتێبی:
لاس و خەزاڵ (فیدایی)
بەرهەمی:
مەلا کەریم فیدایی (1928-1993)
3 خولەک
684 بینین
خاتوونە لە نامە و لە باسی
حاڵی کە دەبوو کەسی نەناسی
بێهۆش و درێژ ئەبوو کەلاکی
دەیڕنییەوە موویی پۆتەلاکی
ئەو داییکە جەرگ پڕ برینە
ئاوایی لە بۆ دەکرد بە شینە
نەسرینە گوڵاڵەکەی جوانم
تاقانە کوڵوکی بەندە نانم
فێک کەرەوەی دڵ و گیانم
سەرچاوەیی خۆشی و ژیانم
بمرم بە غەمانە تۆ نەخۆشی
وا تاڵیی نۆبەتێ دەنۆشی
ئەو ڕۆ کە ئەتۆ کە دەردەداری
کەوتوویە وەڵاتی کوردەواری
هەی ڕۆ نییە کەس کەوا غەمی تۆ
بخوات، و ببێ بە هەمدەمی تۆ
کێ نازی تۆ لەو دەمەی دەکێشێ؟
دەکوشێ سەری پەنجە تا نەهێشێ
بێ کۆمەک و بێ پەنا لە ماڵان
هەر سووکە ئەوەی کە چوو بە تاڵان
ئەو شۆ، شەوە کازیوەی بەیانی
وا دیم، کە شێخ پێی نەزانی
گەر بە وری بەیان بێ لە سەر ڕێم
بەو کەزیە و مووی تۆ قەسەم، دیم
گریا بە هەزر نوکە نوکە
دەیکرد لە شویی خۆی، تووکە
دەیگوت کە لە سەر کچێکی دۆمە
نەسرینی دەخستە ئاو و گومە
هەی هەی لە بەر ئەو حەیاو و شەرمە
بازاڕی سیایی شێخ، گەرمە
کۆبوونەوە ژن لە خان قاتی؟
غەیری کچە ڕشکنەی خەراتی
ڕۆژ و شەو هەر لە پاڵ ئەویدا
وەک لێرەیە ئەو دڵەی وەویدا
لێی مەگرەوە لەو سەرۆکە لۆمە
گەر شویی خەراتە یا نە دۆمە
لەو شێخە موبارەک ئەو کچۆڵە
ئەو گێژە گڕۆڵە ئەو شڕۆڵە
سندووق دەکا پڕ ئەو لە زێڕی
چون خەرتە ئەبەو ژنەی دەگێڕی
بۆ ئەو شووە دەچێتە دێ و کۆڵان
دێنێتەوە نانە ڕەق بە کۆڵان
جادووگەرە ئەو چەتیوە پەیتە
مەکراوی و فێڵەبازە حەیتە
سەرشینە بە گشتەک و بە جادوو
زیندوویی بە فوو دەکا بە مردوو
بردوویەتی شێخ کەوا لە بستە
ناکا لە کن ئەو چەتیوە وستە
جارێ لە کن ئەو کچەی بڵێ لەل
مستی لە دەم هەر دەگاتە چل چەل
چبکەم من ئەلەو ژنەی کە سووکە؟
کوا کارییە لەو، جنێو و تووکە؟
وەی وەی لە هەوایی بووکە سوورێ
دانیشتووە خانم وا لە ژوورێ
فەرماندەر هەر لەسەر چەتیوان
دڵ خۆشکەرە بۆ هەتیو مەتیوان
ئێستاکە دەکا لە ئێمە فێڵان
تاقانە کڵۆکە بۆ جحێڵان
خاتوونە ڕقی لە بۆیە لێ بوو
بەیبوونە دەگەڵ ئەوا هەوێ بوو
لەو لاوەیە ئەو هەوێی بێ سووچ
دەیبیست کە ئەو وتەی پڕ و پووچ
بێ دەنگ ملی دەنا لە گریان
دەیکردەوە دڵ بە شین دەرمان
ژن تا دەبڕا سەر و سەدایی
لێیدا لە دەهۆڵی بێ حەیایی
هەر هێندە جنێوی پێ دەدا، تا
بێ تاقەت و هێز ئەبوو، دەوەستا
کۆبوونەوە عالەمێ لەسەر بان
بۆ بیستینی بەیت و باو لە ژنان
یەک پێ دەکەنی، یەکێ بە تانە
لەو شێخە دوا بە سەد زمانە
دەدواوە هەموو خەڵک لە کاری
لەو کارەیی چەوت و نالەباری