ئاهی دەروون
لە کتێبی:
دیوانی ئەمین ئوشنوویی
بەرهەمی:
ئەمین ئوشنوویی (1889-1954)
1 خولەک
969 بینین
عاشقی ڕووی یارەکیمە یارەکەی ڕوخ وەک قەمەر
موبتەلای بازاڕەکیمە بۆ مەتاعی دین زەرەر
تەن دەگەڵ پەروانە جووتە قەسدی سووتانێ دەکا
دڵ دەگەڵ شەمعێ برایە شەو دەسووتێ تا سەحەر
دووکەڵی ئاهی دەروونم شاهیدی سووتانی دڵ
مەوجی چاوی پڕ لە خوێنم باعیسی زەخمی جگەر
ئەو کەسەی پێی شادەدڵ بووم لێی جودا کردم فەلەک
نووری چاوانم لە کوێیە، کوێوە چوو خاکم بە سەر
شادیی دیداری تۆم ئەی گوڵ موبەددەل بوو بە غەم
وەسڵی تۆم لێ بوو بە هیجر و حەسرەت و ئاهـ و کەسەر
شەو لە هیجری ڕوویی تۆ ئەی مایەیی ڕووحی ڕەوان
سینە سووزان دڵ فرووزان دیدە گریان چەشمی تەڕ
ناڵەیی جانسووز و ئاهی شۆعلە ئەفرووزی «ئەمینناسناوی ئەدەبی»
بۆچ لە تۆ ئەی سەنگدڵ هەرگیز نەبوو جارێ ئەسەر