جوابی نامەی لەیلێ لەلایەن مەجنوونەوە
لە کتێبی:
لەیلا و مەجنوون
بەرهەمی:
خانای قوبادی (1704-1778)
2 خولەک
1560 بینین
نویسا نامەی ئاهریت یاوا
وانام و بۆسام وە دیدەم ساوا
یەخبەند سەردی دەروونم تاوا
مەمنوونم لەیلێ وەلەدی ساوا
بەڵێ بەند من پەی عەشق لەیلەن
کەفائەت مەدیان نەزانان مەیلەن
بەند عەشقی تۆ بەند جەرگمەن
جە ئەوەڵ حەیات تا وە مەرگمەن
نییەن دەسەڵات دەست باڵادەس
سەد واچان مەجنوون پێم کەس و ناکەس
من هەر دێوانەی مەیلەکەی لەیلم
تا بە ڕۆی مەحشەر بە ئەوەن مەیلم
نامە دا قاسد بەردش پەی لەیلی
واناش سەرانسەر بە دەروون کەیلی
مەگەر خواوەند «قاضي الحاجاتعەرەبی»
جە ئەی سیاسەت بدەرۆم نەجات
وەرنە خەلاسیم دوور جە ئیمکانەن
ڕەئی دوو بابۆ و چەند بزورگانەن
خولاسە من قەیس مەجنوون لەیلم
پەی دووری باڵات گیان وە توفەیلم
ڕۆی ئەندوو نیا وە دیوار خەم
شین فەراوان بی، سادی کەردش کەم
قەیس بەو تەور جە بەند بە ئاهـ و زاری
هەر لەیل لەیلش بێ جە بێقەراری
نە وە ڕۆ خوراک نە شەو بێش ئارام
هەر بی نە خەیاڵ دیدەی دڵارام
ڕۆژ بە ڕۆژ زەعیف خوار و زار مەبی
جە وەرین بەدتەر بێ قەرار مەبی
قەوم و خوێش تەمام بە ئاهـ و زاری
واتەن وە مەلووح جە بێقەراری
قەبووڵش نییەن حەق جە باڵای سەر
وەی تەور بۆ مەحبووس قەیس خاکبەسەر
وە عەزم تەواف بيت الله الحرامعەرەبی
بەڵ بەریش کەعبە، بگێرۆش ئارام
مەلووح بی مەلوول بەند دڵخەستە
پەی تەواف بەیت، بی کەمەربەستە