خوێن ڕێژانی یارەکەی من پێکەنین و خەندەیە
لە کتێبی:
دیوانی سامی عەوداڵ
بەرهەمی:
سامی عەوداڵ (1910-1985)
1 خولەک
509 بینین
خوێن ڕێژانی یارەکەی من پێکەنین و خەندەیە
ڕەنگی خوێنی منی غەریب وا لە دەست و پەنجەیە
خەڵقی دەکوژرێ بە خەنجەر من بە توهمەی عیشقی یار
خوێن گروهەم خوێن ڕژێنم یار نەبیتن کێ هەیە
ساحیر و عەییاری یار وەک میهتەری بابانییە
پەرچەمی بۆ گرتنی دڵ داو بە داو و حەڵقەیە
تا نەکەوتمە داوی زوڵفان و کەمەندی یارەکەم
تەیری سەحرا چۆن دەزانی دانە خاڵی کوڵمەیە
ئافتابی ڕوویی بپۆشێ تەیری دڵ بۆ کوێ دەچێ
شەو لەبۆ مەجنوونی بێ کەس پڕ فیغان و فیتنەیە
جەیشی زوڵفانی لەسەر ڕوو چین بە چین وا دێتە پێش
دەنگی سالاری موژانی هاتە هات و هەی هەیە
چەند بە «سامە» دێتە تەدریب مەخسەدی ئەسڵی چییە
لەشکری ڕۆم و فەڕەنگیت، بۆ هەژاری وەک مەیە