دەبا ساتێکی ساکین بێ لە ناڵین قەلبی خوونخوارم
لە کتێبی:
دیوانی سەیفولقوزات
بەرهەمی:
سەیفولقوزات (1876-1945)
2 خولەک
794 بینین
دەبا ساتێکی ساکین بێ لە ناڵین قەلبی خوونخوارم
دەبا تاوێکی فاریغ بێ لە گریان چاوی خوونبارم
هەتاکەی غەرقی سێڵاوی سریشک و ئەشکی خوێنین بم؟
دەبا جارێ بە گۆشەی چاوی مەیلێکی بکا یارم
بە نای ناڵە و بە سینەی چەنگ و تاری غەم موهەییا بووم
بڵێن بۆ سەیری ئەم بەزمە دەمێ با وا بێ دڵدارم
دەرمکەی گەر لەلای خۆت، یا جوێنم پێ بدەی، ناچم
بە زنجیری دوو گیسووت چونکە پێبەند و گرفتارم
نییە تەئسیری وەعزت واعیزا! دەس هەڵگرە لێمان
کە موددێکە بە بادەی چاوی مەستی مەست و خەممارم
شەتی ئەشکم هەتاکەی بێ، مەگەر سەیحوون و جەیحوونە؟
بە چاوم کوت دەبا بەس بێ، وتی: ڕۆبار و جۆبارم
لەتاوی زولفی چین چینت ئەسیری چین و ماچینم
لەسایەی زولف و ڕووت، گا ڕۆژپەرەست، گا بەستەزوننارم
ئەگەرچی حیکمەتە دەرسم، لە حەڵقەی مەدرەسەی عیشقت
گەهێ دەرسم گوڵستانە، گەهێ مەشغووڵی تۆمارم
ترازا دوگمەکەی سینەت، سپێدەی سوبح زاهیر بوو
لە یەک مەشریق دوو ڕۆژم دی، بەجارێ بەو شەوی تارم
بڵێسەی ئاهی سەردم ئاسمانی شین و تاریک کرد
یەقین گوێی ئاسمان کەڕ بوو لەبەر فیغان و هاوارم
حەسەنناسناوی ئەدەبی! چەن خۆشە ناڵینت، ئەگەر یار بێتە باڵینت
بە شەرتێ بێتە سەر قەبرم، بە مردن زۆر منەتبارم