خوا بۆ قوربانی مەڕی داناوە
لە کتێبی:
پەندەکانی پیرەمێرد
بەرهەمی:
پیرەمێرد (1867-1950)
1 خولەک
667 بینین
خوا بۆ قوربانی مەڕی داناوە
کەچی گاجووتی تێوە گلاوە
گوایە گاجووتێک حەوتی سوار ئەبێ
«سێ بە گایی»مان چۆن بە چوار ئەبێ؟
من «گایێکم» بوو، ڕای کرد لە دەستم
ئەم جەژنە پەکی «حەوتمی» خستم
سەد قوربان حەقی ناس نافەوتێنێ
ئاگری جەهەننەم گایش ئەبرژێنێ
خۆ من تێر گۆشتی قوربانیم بۆ هات
چیم لەوەی خێوی کەوتوە لە «سیرات»
ئەگەر تۆ ماڵی خەڵکت خواردبێ
ناڕوا، سەد گایشت قوربانی ناردبێ
من کە حەقی خۆم بە کەس نەبەخشم
خوا پێم نابەخشێ بە تۆ نەبەخشم
بە دزی ئەیبەی ئەیدەی بە مەعلووم
ناوی خۆت ناوە فاسقی مەحرووم
مردووشۆر پارەی خۆی وەرئەگرێ
بەو چی لە گۆڕدا مردوو لێی ئەدرێ؟
«کەوای» نیوداشتت کە وا لەبەردا
خەمی تازەتر بخۆ لە بەردا