پیاوێ کە پیاو بێ ئەبێ تێفکرێ
لە کتێبی:
پەندەکانی پیرەمێرد
بەرهەمی:
پیرەمێرد (1867-1950)
2 خولەک
1087 بینین
پیاوێ کە پیاو بێ ئەبێ تێفکرێ
ئەو ڕەخنەیەی خەڵک لەوی دەگرێ
ئەگەر وەک ئەڵێن ئەو عەیبە ڕاست بێ
چارەی ئەو عەیبەی لە خوا خواست بێ
خۆی هەوڵ بدا بۆ ئەخلاقی خۆی
تا ڕێی توانجی کەس نەمێنێ بۆی
بەوە زوبانی خەڵکی دەبەستێ
نەک بەویش نەڵێن ئەو قینی هەستێ
هەندێکی وا هەن بە کشە مرێ
لە مر، مردنی خۆی، لێدەگرێ
ئەگەر خۆ بڵێن بە زەردەواڵە
سیرە گۆشتی من بە دەمت تاڵە
ئەڵێن ئەو تاڵە تاڵیەکی ترە
لە گەڵ ئەمانە وەرە دەربەرە
من ئەڵێم پەندم سەر دەر هەوایە
هەموو شێعرێکم بەبێ مەعنایە
ئەڵێن: هەر چەندە زۆر بێ مەعنایە
کەچی بۆ ئێمە هەر مەعنای تیایە
هەی هاوار ئەگەر چشتێ شک نەبا
بۆچ «دار هەڵبڕە» بۆ سەر خۆی ئەبا
تۆ پاک دەروون بە و گوێ مەدەرە کەس
گوێ لە واتەی چاک بگرە و ئیتر بەس
ئەڵێن: کە گۆزە هەر چیەکی تیابێ
ئەبێ تەڕایی وای لێ پەیدا بێ
لەلای من ڕاستە عیلمی قیافەت
پیاوی نەزان و ساحێب درایەت
شافیعی باشی لێک کردوونەوە
چاک تێیان ئەگەین بە وردبوونەوە
ئەگەر پەیڕەوی ئەو عیلمە بکەین
لە ماهییەتی هەموو کەس ئەگەین
بەڵام هی وایان هەیە بە تەفرە
لای گەورە ئەبێ بە پیاوی گەورە
کەچی ئەبینی زۆری پێ ناچێ
سەری لا دەچێ بە نووکە پاچێ
داخم ئەو داخە ئێمە بەم حاڵە
ئەمانە دەڵێن، لای هەندێ تاڵە