بەسەر نەتاشین نابیە قەلەندەر
لە کتێبی:
پەندەکانی پیرەمێرد
بەرهەمی:
پیرەمێرد (1867-1950)
2 خولەک
1079 بینین
بەسەر نەتاشین نابیە قەلەندەر
بە ئاوێنەیەک نابیە ئەسکەندەر
بە تووڕەبوون و کڵاو خوار دانان
نابیە قوماندان تا نەچیە مەیدان
سوار هەتا نەگلێ نابێ بە سوار
برنج نەکوترێ ناچێتە بازاڕ
تا تینی کوورە نەبینێ تەواو
بەردی ڕەق نابێ بە شووشەی گوڵاو
تاتۆی هەورامی بارگیرێکی بوو
لەناو کەرسواردا بە یەکەم دەرچوو
ئەیگوت یە بادەن ئینە بارانەن
پا، بارەی ڕەزمی شەهریارانەن
تا ڕۆژێ کەوتە ناو تیپی سوار
دەرنەچوو، دواکەوت وەک کەری ژێربار
بانگی کرد یاران «یابوو»م وەستاوە
تمەز هەرەنی یا مادە گاوە
تۆیش کە کەوتیە سەودای خودبینی
خۆت لە ئاوێنەی دێودا ئەبینی
تا گیزەی گوللەت نەبێ بە سەردا
تا ڕاتنەفڕێنن بە دەشت و دەردا
قەدری وێرانەی عجوز نازانی
لە هەموو شوێنێ مەردی مەیدانی
کە بە چڵوچۆ چوویتە سەر کورسی
ئیتر لە دۆستی کۆنە ناپرسی!
ئەوی لە دیزەی خەڵکدا ئەسکوێیە
هیچ کەس نازانێ ئەسڵی لە کوێیە
هەندێک کە وتیان قسەیان خۆشە
کە ڕازیان دادا دڵیان بە جۆشە
هیچ ئەملاوئەولای خۆیان ناڕوانن
سافیلکەن خەڵکی بە دۆست ئەزانن
تا پیادەی غەیبی لێیان ئەگۆڕێ
بێ ئەجەل لەپڕ ئەکەونە گۆڕێ
گۆڕی بێ، بۆچی قسەی مووش ئەکا
بۆ پێکەنینی خەڵک، خۆی تووش ئەکا
دەردی جوانییە پێوەندی پێی گوڵ
بەڵای زمانە قەفەسی بولبول
مەسکەنی مشکان درزی دیوارە
ئەبێ بزانێ مشکیش گوێدارە
گوڵم دی لەسەر ئاگر ئەکوڵا
ئەمەم لێ بووبووە گرێ لە دڵا
وتم: چییە ئەم هەڵقرچانەی تۆ
وتی: پێکەنیم بۆیە وام بۆ بۆ