فریشتەی جوانی، شۆخی پەری ڕوو
فریشتەی جوانی
لە کتێبی:
دیوانی عەونی
بەرهەمی:
عەونی (1914-1992)
1 خولەک
822 بینین
فریشتەی جوانی، شۆخی پەری ڕوو
داد لە دڵداری، وای لە دەستی تۆ
نێچیرت کردم بە نیگای چاوت
خستمتە بەندی پەرچەمی خاوت
خۆ ڕزگار بوونم یەکجار مەحاڵە
گەیشتن بە تۆ خەون و خەیاڵە
تۆ کە هەمیشە بە شادمانی
لە پلەی بەرزی و شۆخی و جوانی
دەڵێی پەروەردەی بەهەشتی خوایی
لە بەرز فڕین لاف و دارایی
منیش کۆست کەوتووی چاڵی خەمباری
لەو پەڕی ڕووتی و لاتی و هەژاری
ئای لە دڵداری دەردی گرانە
تایبەتی بۆ من کە بێ دەرمانە
ئاسمان و ڕێسمان لە من ڕووی داوە
گەیشتن بە تۆ خەیاڵی خاوە!