ساقی بدە ئیمڕۆ کە بە دڵ شیشە شەرابێ
لە کتێبی:
دیوانی عاسی
بەرهەمی:
مەلا مستەفای عاسی (1885-1975)
1 خولەک
948 بینین
ساقی بدە ئیمڕۆ کە بە دڵ شیشە شەرابێ
مەدهۆشە دڵی خەستە لەبۆ دەنگی ڕەبابێ
عاشق دەبێ بۆ کوشتنی مەعشووقە نەناڵێ
بێ گریە و ناڵان و فوغان دەنگ و سەدا بێ
هەر ڕۆژە بە سەد نەعێ دەکا عیشوە و نازێ
ئەو دڵبەرە ڕەعنایە هەتا ڕووحی فیدابێ
ئەو تیرە لە جەرگی منی دا زەحمەتە یاران
بۆ دەردی منی خەستە چە دەرمان و شیفا بێ
تک تک ئەتکێ خوێنی جگەر ئیمڕۆ بە دڵما
وەک ئەشکی سەحەرخیزە بە ئومێدی جەزا بێ
مەجنوونم و سەرئاسیمە بێعەقڵ و حەواسم
ساقی وەرە پڕکە بینە بۆم شووشە شەرابێ
عاسیناسناوی ئەدەبی لە کەمەندی سەری زوڵفت کە بناڵێ
کوژراوی خەندەگی موژەت و تیری بەڵا بێ