شێخ عەلائەدینی بیارە لە ١٩٥٤/٣/١٨دا...
شێخ عەلائەدینی بیارە لە ١٩٥٤/٣/١٨دا کۆچی دوایی کرد. شێخ عوسمانی کوڕە گەورەیان لە شوێنی دانا، بۆ پرسەنامە و شادمانی جێنشینی لە ١٩٥٤/٣/٢٦دا نامەیەکم بۆ شێخ عوسمان نووسی، بە ناوی پارچەیەک لە ئەدەبی نامەی کوردییەوە وێنەکەی لێرەدا نووسرایەوە:
جێنشینی بنەماڵە و هیوا بەخشی ئەو ماڵە، ئەو کۆچەی شێخی بیارە و گوڵی ئەو دیارە کردی نێشی جێگە برینی لە دڵی دۆست و یارانا گەلێ بە سۆزترە لە تیری خەرقە پۆشان لە گۆشەی دڵی مەی نۆشانا!
دنیا هەوارگەی بێ کەسان و بێ نەوایانە، ئەو کەسەی ڕووبەڕووی مەزاری پاک ئەبێتەوە بۆ جێگایەکی دیاری سەر ئەنێتەوە، لە نەمانەوەر و ئەکاتەمان، لە کۆڵیتی بێ وەفاوە ئەچێتە کۆشکی با سەفا، کە واتە وا مەزانە شێخت ڕۆیشت، وابزانی چوونی بۆ مانتە و مانیشت بۆ شانتە.
ئەو شوێنەی تۆ لێی دائەنیشی جێ ماڵە گەورەیە، شێخانی ڕابردوو پێیان ڕەوا بینیت بە گوڵێ هەمیشە بەهاری ئەو باخە، چاوت لە شوێنی شوێنداران بێ، ئاگری کینەی یاران بە ئاوی دەروونی فراونی خۆت بکوژێنەوە.
کە وات کرد، ژیانت ژینی یاران ئەبێ و نەمامت سەربەرزی باخی ئازدان. ڕەوانی پاکی شێخی ڕابردوو لە بەهەشتی بەرینا لە کۆڕی خواناسانا نزای سەرفرازیت بۆ ئەکا.
منیش دڵت ئەدەمەوە بە سوورەی موبارەکەی فاتحە... دۆستی ئەو خانەدانە
سەجادی