وەسیەت
لە کتێبی:
دیوانی ئەسیری
بەرهەمی:
ئەسیری (1895-1962)
2 خولەک
678 بینین
وەسییەت بێ ئەگەر مردم وەرە سەر گۆڕەکەم قالە
بڵێ ئاواتەکەت پێکهات هەڵستە بێرەدەر خاڵە
کە بوویتە سەرجەلەو سەرپۆلی گەورەی لەشکری کوردان
لەبەر هیچ ئەزیەت و جەورێ، نەکەی ئۆف و نەکەی ناڵە
بەخۆت و لەشکر و پۆلت لەسەر گۆڕم مەشق دادەن
ئومێدم وایە زندووبم لەبەر شادی بەئەو حاڵە
وەکو خاڵت بە، ئەی ڕۆڵە، خەریکی کاری میللەت بە
ئەوەی خەرجی ئەکا خاڵت لەڕێی خزمەت سەر و ماڵە
بڕازێوە بەزانین و بەچاکە و دین و چاوتێری
لە ئازایی وەهابە، پێت بڵێن وەک ڕۆستەمی زاڵە
بەفەڕڕە ئەو کەسەی وا سەنگەری تیر و غەم و دەردە
لە ڕێگەی میللەتی کوژرا، لەژێر خاکا کفن ئاڵە
عەزیزە ئەو کەسەی کۆشش بکا بۆ هاوزوبانی خۆی
ئەگەرچی ژینی تاڵە، عاجزە بەدبەختە کەم حاڵە
شەهیدی میللەتم تەسلیمی خاکم کەن گەلی کوردی
بپۆشن خاکی سەر گۆڕم، بەڕەیحان و گوڵ و لالە
لە ڕێگەی میللەتت هەر چیت بەسەر بێ خۆشە ئەی ڕۆڵە
لە ژووری لاپەڕەی تەئریخ ئەنووسرێ سوورەتت قالە
موکافاتی ئەسیریناسناوی ئەدەبی ڕۆژی مەحشەر بادەیی کەوسەر
ئە لەم دنیایی دوونە، بێ بەشە، دایم دەمی تاڵە