دەم پەرستی وەتەن و ...
لە کتێبی:
دیوانی ئەسیری
بەرهەمی:
ئەسیری (1895-1962)
1 خولەک
607 بینین
نیشتمانێکم هەیە دڵبەر و سەر پشکی جیهان
لە جیهانا هەیەتی ناوی خۆش و ناوونیشان
بەدرەخت و گوڵ و گوڵزار و ڕەز و باغ و چەمی
دۆتەیی شۆخ و قەشەنگە، گەش و ڕەنگین و جوان
فەڕی چین چینە لەسەر یەک وەکو زوڵفی دولبەر
داری بەرزی بەری، ژێری لەوەڕە و ئاوی ڕەوان
ڕووی زەویی وایە، بنی زیو و زەڕ و جیوە و نەوت
بستەجێیێکی نییە تیایا نەبێ گەنج و کان
ئەسەلی زیرەکیی گەل خۆشی و پێکەوتەیی خاک
لە گەوای ئەم وتەیە کورد کە نەیگۆڕی زوان
گەر دروست بوایە پەرستیی جگە خوایی یەزدان
دەمپەرستی وەتەن و، دەمگوت خوامە نیشتمان
تاکو ماوم هەموو پێویستییەک و خۆراکم ئەدا
هەر کە مردم دەچمە باوەشی دەستم لەملان
ئەی ئەسیریناسناوی ئەدەبی لە سەرت چاکەیی زۆرە وەتەن
تۆش ڕەوایە بۆ ئەوەی خۆت کەیە کوشتی، قوربان