دەردی تۆرانی
لە کتێبی:
دیوانی ئەسیری
بەرهەمی:
ئەسیری (1895-1962)
1 خولەک
895 بینین
پێشوو و ئێستەم پەرێشانی بوو، ئاهو دەرد و غەم
جێگە وو دەورم لەبەر فرمێسکی چاوم بوو بەنەم
ئاگری سینەم بەفرمێسکم گڕی دانامرێ
داغە جەرگی ئاگرینم زەهر ئەنۆشم دەم بەدەم
گەرچی وەک ئاسک لە بێستانی وڵاتم گەشت ئەکەم
فائیدەی چی هەر وەکو ڕێوی گرفتاری تەڵەم
کەوتمە دەریایی داگر دەردی بێ پایانی تۆ
ڕۆڵەیی کوردم نەجاتم چۆن ئەدا مەرگە مەلەم
چوار سەد ساڵ بوو لە بۆ تۆرانییان ڕەنجت ئەدا
وا بەناهەق دەتکوژن بۆ تۆیە ئاهـ و وەلوەلەم
ڕووت و قووت و برسی وو بێ عیلم و جاهیل مایتەوە
تێگەیشتووی میللەتت سینەی بووە کانی ئەلەم
بێ بەشی عیلم و مەعاریف، سەنعەتن تۆرانییان
لاکن ئوستادی جیهانن هەر بەفیشاڵ و بەدەم
چەر کەس و کورد و عەرەبیان خستە دەردی ئەرنەود
بۆ خۆیان ماوەتەوە دنیا سەروژێر بێ چ غەم
گەر بنووسی کردەوە و بەدخووییی تۆرانییان
ئیکتیفا ناکا ئەسیریناسناوی ئەدەبی قاقزی دنیا و قەڵەم