بۆ مودیری کائینات
لە کتێبی:
دیوانی ئەسیری
بەرهەمی:
ئەسیری (1895-1962)
1 خولەک
610 بینین
دایم لەفیکر و زیکری خەیاڵاتی میللەتم
بۆیە وا کز و مەلوول و بەسۆز و حەسرەتم
ئەی ڕۆڵە دەردی تۆ بەندی جگەرمی بڕی
تەئسیری داغی حاڵی تووە من بەعیللەتم
ئەم کوورەیەی لە سینە دەگڕێ وەها بەجۆش
تیایا بەڕاستی دەسووتێ جەرگی لەت لەتم
شەرت بێ نەکەم لە کاری تۆ یەک زەڕەیێ قسوور
گەرچە لە مەعرەز تووشی سێدارە و پەتم
من پیر و مورشیدی تۆم نەوڕەسیدی گوڵ
گەر بمکوژن لە ئیشی تۆدا، نابێ میننەتم
ئەم ئارەزووی ئاتەشینە لەمن ئاشکارە بوو
لۆمەم دەکەن لە تەوبیخ و بەحس و سوحبەتم
هەرچەند کە تووشی تەهلوکەیێ بم لە ڕێی وەتەن
دەم دەم زیاد ئەبێ شەرەف و شان و عیززەتم
چارەی تۆ ئینتیباهێک و عیلم و مەعاریفە
چارەی منیش فیداتی بکەم نەقدو سەروەتم
عەرزی ئەسیریناسناوی ئەدەبی لە خزمەتی مودیری کائینات
یارەبی تەڕەحومێ بەگەلی کوردی میللەتم