غونچەیی نەوبەهاری گوڵ دەرچوو لە دەستی باغەوان
لە کتێبی:
دیوانی سافی هیرانی
بەرهەمی:
سافی هیرانی (1873-1942)
1 خولەک
1361 بینین
غونچەیی نەوبەهاری گوڵ دەرچوو لە دەستی باغەوان
بولبولی دەردەداری دڵ زاری گەیشتە ئاسمان
بایی خەزانە دەنگ ئەدا، گوڵ کە بەزەردی ڕەنگ ئەدا
بولبولە سەر لەسەنگ ئەدا غونچە لە باغدا نەمان
ئەو دڵی بێقەرارەکەم، کەوتە هەوایی یارەکەم
سەبری لە کێوە چارەکەم، زەحمەتە دەردی وا گران
دەوری فەلەک بەحیلە بوو فەسڵی بەهاری بردو و چوو
ڕەنگی خەزانی دامە ڕوو، جوملە بەڵایی خستە جان
دووریی یاری غونچەدەم، خستیە سەر دڵم ئەلەم
وا ئەسفا لە دەوری غەم دەرسی فیراق ئەدا نیشان
هیجر و فیراقی دڵبەرم داویە لە سینە خەنجەرم
شەکوە بە لایی کێ بەرم، ڕوو لە چ لا کەم ئەلئەمان؟
یادی وەفایی کێ بکەم، مەیلی هەوایی کێ بکەم؟
چارە لە لایی کێ بکەم، غەیری خودایی موستەعان؟
ئەی فەلەکا خەتام نییە، کینەیی تۆ لە من چییە
زوڵمی وا کەس نەکردییە، دەرهەق بە من لە ئینس و جان
سافیناسناوی ئەدەبی لە دەردی فیرقەتە، چارەیی حاڵی زەحمەتە
زامی بە ئێش و ئەزیەتە، دڵ بە برین و ئێش و ژان