تراوکە
لە کتێبی:
گوناهـ
بەرهەمی:
عەلی حەسەنیانی (1939-1992)
1 خولەک
1354 بینین
تراوکە
بە دەنگی: عەلی حەسەنیانی
گوڵم! تۆ ڕەمزی بوونی، هۆی ژیانی!
گزینگی دڵنشینی بەربەیانی!
گڕی عیشقی، فریشتەی خۆشەویستی!
هەناسەی چاوەڕێی کاتی ژوانی!
تکەی فرمێسکی شللێری بەشەرمی!
بزەی مەندی گەزیزەی لاپەڕانی!
ڤێنووسی، باڵی نەخشینی پەپوولەی!
گمەی کۆتری دڵی، وەزنی ڕەوانی!
دنەی دەنگی، زرینگەی جامی بادەی!
ئەوینی، پێکەنینی ساردەکانی!
لە سەر پەلکی گوڵاڵەی دەم بەهاران!
دڵۆپی شەونمی ڕوون و جوانی!
لە تاریکیی شەوی بێ نوور و سوێدا،
گڕی، بۆ ڕێگە ونبوو ڕازی مانی!
بە ڕۆیین چەشنی کەروێشکەی بەهاری!
بە مەندی هەر وەکوو شەرمی کچانی!
لە چاوی ڕێبواری ڕێی ئەوینا،
تراوکەی دەشتی پان و بێبڕانی!
لە هاندی تۆ هەموو هێزێ دەوەستێ،
ئەتۆ ڕاگیرکەری چەرخی زەمانی!
هومێدی ناهومێدی دڵ خەمینی!
کەچی بۆ من هومێدی بێنیشانی!
من و تۆ چەندە لێک دوورین، هاوار
ئەمن دەسکورتم و تۆ کاکەشانی!