دلگرتنا کۆرا
لە کتێبی:
شەفاق
بەرهەمی:
جگەرخوێن (1903-1984)
2 خولەک
999 بینین
کۆر بوو محەمەد هەسۆ
دل کەت هەلیما رەسۆ
دەما دغانە جەم هەڤ
رۆژ ل جەم وان دبوو شەڤ
دەست دبر سەر موێ وێ
دچوو چاڤ و روێ وێ
هەڤدی دکرنە هەمبێز
دەڤ و روو تەڤ دبوون مێز
لاشێ وان تەڤ دهەژی
دل ژ ئەڤینێ تژی
پێژنکەر بوون ب گوهێ خوە
زوو دگوهازتن جهێ خوە
مهەمەد قالوونکێش بوو
هەردەم قالوون ل پێش بوو
وی خوەش دکشاند ب کوش-کوش
دخان ل سەر دبوو مژ
مەد گۆ: مهەمەد هەسۆ
دل کەت هەلیما رەسۆ...
وی ناسنەدکر ناڤێ مە
دژوون ددان باڤێ مە
دار تاڤێتە نگێ مە
جارنا دکەت زکێ مە
خۆرت و قیز بوون لێ جوان
ئەم زارۆ بوون، پر نەزان
مەد گۆ: چما رۆژ و شەڤ
ئەڤ هەردوو کۆر دغێن هەڤ؟
ئەڤینا وان خوەش و رند
بووبوو چیرۆک ل ناڤ گوند
هەرکەس ب وان دکەنی
لێ، نە راستە، ئەز بەنی،
کۆر ژی وەکە مە مرۆڤ
هەتا وەکە هرچ و هۆڤ
خوەدی دل و تژی ڤین
ئەو ژی دلبژێن ئەڤین
ئەڤین تمی وەک ئارە
لێیا کۆران دژوارە
کۆر ب کۆران تم کەدی
بێ فەهێت و بێ فەدی
هەڤدی دگرن، بەرنادن
کەس نابێنن، ئازادن
نە شەرم هەیە، نە فەدی
کارێ وان زوو ناقەدی
هەڤدی دگرن، دگڤێشن
وەکە مێش و دەروێشن
ل ناڤ بەخچە دمێنن
کۆرن، کەسی نابێنن
دخوازن ببنە یەک لاش
زوو خوە ژ هەڤ نادن پاش
ب دل هەردوو دبن یەک
مەگەر د کنجان دە تەک
ئەون د وان دە خورتە
نا، ئەز شاشم، پر سرتە
دل ب رۆنی وەک رۆژن
رۆژێ ب دل دسۆژن
نە ب مال و جان و زێر
هەردوو ژ هەڤ نابن تێر
ئەو ژی وەک مە مرۆڤن
ب دلگرتن وەک هۆڤن
وەک دبێژی جگەرخوینناسناوی ئەدەبی:
جهان مشتە ژ ئەڤین