ژان

هەلا ژان!
ژانا کرێت،
ژانا زراڤ!..
پەڕتاند
تە ژ من هەر،
جەرگ و هناڤ.
تو کەتی
ناڤا سەرێ
مللەتێ من،
نەخوەش بوون
گرس و بچووک
تەڤ مێر و ژن.
تە بەردان
شاخێن د خوە
هەیا ب دل،
تە گەڕاند
جانێ د وان
تەڤ ریش و کول..
تو ژانا گرانی،
ناڤێ تە نەزانی،
بێ شک تو نەیاری
ب هۆگر و یاری
یارێن تە نەیارن
بۆ من وەکی مارن
ژەهرا وانا جانکوژ
لێڤێن وانێ خوینمژ
مللەت کرن سەرمەست
نەزان دیل و بندەست
قەلسۆک و رەبەن ژار
بندەستێ کۆلیدار
ئەڤ بوونە هەزار سال
بێ روومەت و بێ ئال
بێ گازن
بێ دەنگ
بێ گلی
بێ جەنگ
مللەت خوە سپارت
دۆست و یارێن تە
نڤست کەتە خەو
د ناڤ وارێن تە
خەوەکە کامباخ
خەوەکە دژوار
بێ هێڤی ژ ژین
بن دەستێ نەیار
ل سەر وی کۆم بوون
قڕاکێن لەشخوەر
جەندەک راکێشان
وەکی سەگ و گور
مەلان ب نڤشتان
شێخان ژی ب خشتان
ئاغایێن دز
بەگێن خنز
بوون باڤ و دیێن تە
هم دەست و پیێن تە
بن دارێ کۆلیدار
ئەم هێلانە زیڤار
ژ مال،
ژ جان،
ژ ڤین،
و رامان،
زۆرکەرێن خوینمژ
سۆفیێن پۆڕگژ
ژ بۆ تە پشتمێر
دا کو ببن تێر
رچا تە ئاڤ دان
د جانێ مللەت
تو بوو ژ بۆ وان
هەیین و دەولەت
هۆلێ ل مە دان
ئەو تیرا جانکوژ
وان گورێن بێباڤ
زووریێن خوینمژ
ئەو گور
ڤەشرین
د کاڤلێ بەرخ
ل مە
بادان
وان فەلەک و چەرخ
هۆلێ
ئەم بوون
دل و بەلەنگاز!
ژ بۆ
رۆڤی
هەر تەوز و تناز..هەلا ژان!
ژانا تەرەس
ژانا قڕێژ
دناسم
دژمنێ من
تویی ژ مێژ
پشتی مە ناسی
ئەم بوونە هشیار
کارکەر و جۆتکار
بەلەنگاز، زیڤار
گوندی، باژاڕی
زانا، جەوێلەک
ژ بۆ شەڕێ تە
هەمی بوونە یەک
ئیرۆ
مللەت
چیچکی پزڤی
زانا
مێرخاس
جهـ، جهـ دلڤی
رێزان
کۆمەل
جڤین و جڤان
یەکیتی
تەڤگەڕ
بوو ئارمانجا وان
داوی
ناسین
کو تویی دژمن
بەری
دان تە
ژ رێیەکە کن
ئەو دێ
ژێکن
دەست و پیێن تە
بکوژن
بگورێن
باڤ و دیێن تە
تە جهـ
نەما
د ناڤا کوردان
بمر
بقەش
هەڕە نک شەیتان.