هەتا چەرخی ژیانە، کۆمەڵی کوردانە بەسرا بێ
لە کتێبی:
دیوانی ڕاجی
بەرهەمی:
ڕاجی (1912-1969)
2 خولەک
91 بینین
هەتا چەرخی ژیانە، کۆمەڵی کوردانە بەسرا بێ
سەروکاری ڕەوشت و خوو، بە سەد شیرازە هۆنرا بێ
بڵێنە سادە ڕوویان، بەزمی مەی بگرن بە هەر لادا
بڵێن گۆیندە ئاوازیان، لە هەر شێوە لە داوا بێ
بڵێنە پۆلی شادی، ڕوو لە ئاونگی گژوگیا کەن
تنۆکی ئارەقەی ڕووی دڵبەران تێکەڵ بە باڵا بێ
بڵێنە ڕووت و قووتانی مەحەببەت، ئێستە یاری کەن
کە زانیومە، هەموو کەس خۆشەویستی دێ بە ڕووی شابێ
کە جەژنی عالەم ئارایە، گەلی کوردانە وەستاون
ئەبێ هەر کەس لە دیوانی ئەدەب سەرخۆش و ئازا بێ
بە پیرۆزگاری و تۆقە، جەماوەر زێوەری بەخشی
دەسی یەک بەرمەدەن، بیگرن، ئەگەر منداڵی ساوا بێ
بنێرنە دوا کچان کۆ بن، بە هاڕە و هاژە دابڕژێن
لە هەر لا، خانم و بەگزادە تێکەڵ ئاڵ و واڵا بێ
مەلا و شێخ و جبە و مەندیل و شاڵ، باوێنە کووپەی مەی
هەموو بیانشۆنەوە خاوێن، نەوەک ئەم ڕۆژە ئاوا بێ
هەموو مێرگ و ڕەز و باغان، بکەن نازا و ڕازاوە
چریکەی بولبول و قومری، زریکەی پیر و بوڕنا بێ
بە دوو دەس بادەگێڕی زەوق و خۆشی، ڕاست و چەپ مەی دا
دەهۆڵ و تەپڵ و تەمبوورە و، کەمانچە و عوود و زوڕنا بێ
بڵێنە دڵبەری شیرین زمان، لەم بەزمەدا فەرموێ
بە دەستوورێکی شاهی، غەرقی خشڵ و نەخش و زیبا بێ
بڕۆن، مردوو لە گۆڕان تێگەیێنن، خوا عەفووی کردن
خودا هەر نوور ئەبارێنێ، کە گەل تێکڕا بە یەک شا بێ
مەگەر بیر و ژیانی نوێ، لەگەڵ ئیمڕۆکە سازاوە
کە ڕاجیناسناوی ئەدەبی خۆی لە بەرگی یەکدڵی، وەک خونچە پێچا بێ