نییە بێ ڕەحمی وەکوو تۆ، نە لە موسلیم، نە فەڕەنگ
لە کتێبی:
دیوانی ڕاجی
بەرهەمی:
ڕاجی (1912-1969)
1 خولەک
108 بینین
نییە بێ ڕەحمی وەکوو تۆ، نە لە موسلیم، نە فەڕەنگ
تالیبی قەتڵی منی تۆ، بە خەدەنگ و بە تفەنگ
نایەوێ شۆر و فوغانی من و، دڵتەنگیی تۆ
مالیکی ڕۆح و دڵی تۆ، چ بە سوڵح و، چ بە جەنگ
شێوەیی پەرچەم و لەعلی لەبەکەت، نەمدیوە
هیچ شتێکی لە جیهانا، چ بە بێن و چ بە ڕەنگ
بادەیی چاوی سیاهت، لە لەبی عوششاقان
تا ئەبەد سارییە، بێ وەسفە، بە زوو یا بە درەنگ
هێندە موشتاقە بە ماچی لەبەکانت، دڵی زار
تۆش بە یەک غەمزە ئەکەی کەسری، وەکوو شوشە و سەنگ
ماسییە عاشقی غەمبار، لەناو بەحری فەنادا
کوا ئەگەر گەوهەری وەسڵی تۆ ببێ کامی نەهەنگ؟
ڕاجیاناسناوی ئەدەبی، کەی ئەگەیە مەنزڵی جانانەیی یار؟
بەم هەموو باری غەم و، غوسسە و، بەم لاشەیی لەنگ