کودەتا

جادە پشتی چەماندەوە
سیگناڵی ئەژدیهای سەفەر
ناڵاندی و تەنیاییمی لاواندەوە
دەستی هانی خۆشەویستم
دەستی گرتم...
وتی: پێم دە یادگارێ
دەستم نایە سەری سینگم
- نەمداوە پێت مەگەر گوڵم؟
وتی: کوانێ؟
وتم: دڵم!
وتی: ئەوە دەیان ساڵە لە لام دایە
وتم: هانێ گیانیش لەگەڵ خۆتا ببە!
گیانم بوو بە سێ باڵندەی لانەی ئەوین
لەگەڵ دڵدارا هەڵفڕین!
ئاخ!
گەر بۆم بلوێ
لە سەر نەخشەی وڵاتەکان
هەموو جادە و شەقامەکان دەسڕمەوە
ئیزنی کۆچ و سەفەر نادەم
ئەم یاسایە دڵتەزێنە
بە کوودەتای ئەوینداران
لە جیهانا دەبڕمەوە!