ذکر سال اول از هجرت منصب مؤذنی بر بلال حبشی قرار گرفت
لە کتێبی:
روضة الصفا
بەرهەمی:
میرزا عەبدولقادری پاوەیی (1850-1910)
4 خولەک
250 بینین
بەڵێ جە قودرەت کەس وە سڕ نەزان
دنیا خاڵی بی جە سەڎای ئەزان
سەحابان جە وەقت جومعە و جەماعەت
بەعزێ حازر بین ساعەت بە ساعەت
بەعزێ بە تەنها تاعەت مەکەردن
بێ وەخت وە مەسجێد تەشریف مەبەردن
موحتاج بین جە ئێڎ بە وادەی تاعەت
بشان وە مەسجێد گشت پەی جەماعەت
یەک ڕۆ جە مەسجێد سەحابەی کێرام
یەکسەر جە حزوور شای «خیر الأنام»
پەی ئێحزار خەلق مەشوەرەت کەردن
هەر یەک خەیاڵێ نە دڵ ئاوەردن
بەعزێ واتشان ئەر مەردوم کەم بۆ
با بڎەین نە دەف تا یەکسەر جەم بۆ
حەزرەت فەرماوا ئانە بێ سوودەن
دەف زەدەن وە نەوع شەنبەی یەهوودەن
بەعزێ هەم واتن با چەنی خرووس
جە وادەی سەلات بدەین وە ناقووس
حەزرەت هەم دیسان فەرما وە یاران
زاهێرەن ناقووس پێشەی نەساران
بەعزێ واتشان هەر وەخت نما کەین
بادا ئاتەشێ عەزیم وە پا کەین
حەزرەت فەرماوا بەو دڵ مەحبووسەن
ئاتەش قاعێدەی ئەهل مەجووسەن
تا ئاخر ئەمیر فارووق ئەعزەم
بەتاڵ کەرد تەدبیر یاران گشت وە هەم
عەرز کەرد فێدات بام «یا رسول الله»
شەخسێ مەعلووم کەر وە ئێزن ئەڵڵا
بشۆ وە بەرزی، بوڵەند وە ئاواز
واچۆ «الصلوةعەرەبی» هەی وادەی نماز
حەزرەت جەو تەدبیر یاران فەرد فەرد
هەر قەوڵ فارووق ئەعزەم پەسەند کەرد
بێلال حەبەش تەڵەب کەرد دەرسات
فەرما ئەی ڕەفێق یار خۆش سێفات
بە ئێزن مەعبوود دەهندەی داوەر
تۆ بشۆ وە بان بوڵەند مێنبەر
وە ئاواز بەرز جە ڕووی کائێنات
هەر یەک ڕۆ پەنج جار واچە «الصلوةعەرەبی»
بێلال جەو دما تەشریف مەبەردش
جە بان مێنبەر نێدا مەکەردش
مەوات «الصلوةعەرەبی» وادەی نمازەن
وەخت عێبادەت شای بێ نیازەن
یەکێ موکەڕەم جە یاران یار
یانی عەبدوڵڵا بن زەید ئەنسار
شی نە جامەی خاو یەک شەو نە شەوان
دیش نە خاودا شەخسێ نەو جەوان
ناقووسێ دارۆ بەڵام چ ناقووس
ئاڵای عەجەب تەرز سیای ئابنووس
واتش ئی ناقووس وە بێ بەهانە
بفرۆشە بە من بەهاش بسانە
واتش وەی ناقووس چێشەن نیازت
جە کام بابەتەن سۆز و گودازت
عەبدوڵڵا واتش ڕەمزش دیارەن
پەرێ ئەسحابان خەیلێ وە کارەن
هەر وەخت بڎەین لێش بێ زیاد و کەم
یاران پەی «صلوةعەرەبی» یەکسەر مەبان جەم
زومرەی ئەسحابان ساعەت وە ساعەت
حازر بان جە وەخت جومعە و جەماعەت
ئەو شەخسە واتش من چێوێ جە نۆ
جە ناقووس خاستەر بواچوون وە تۆ
بە نام ئەکبەر کەریم کارساز
جەمع کەلێمات ئەزان بە ئاواز
تەعلیم کەرد پەنەش چوون دەرس ئوستاد
ڕەوان کەرد پەنەش تا نەشۆش وە یاد
ناگا عەبدوڵڵا جەو خاو شیرین
بێدار بی بە ئەمر بینای بێهتەرین
دیش ئەو ڕوئیا گشت وە ڕۆ ئاوەردش
نەقشەن نە ڕووی دڵ پاک بێگەردش
کەسێ جە مەتڵەب نەکەرد با خەبەر
تا شی وە مەنزڵ شای «خير البشرعەرەبی»
غەرەز، واقێعەی ڕوئیای وێش تەمام
عەرز کەرد نە حزوور شای «خير الأنامعەرەبی»
جەو تەرەف بووبەکر سددیق ئەکبەر
مەحرەم وە ئەسرار ڕاز پێغەمبەر
واتش بە خوڎای کەعبەی موعەززەم
منیچ هەم ئێمشەو بەو تەور دیم وە چەم
ئەمیر عادڵ فارووق سالار
عەرز کەرد نە خدمەت شای بوڕڕاق سوار
وات منیچ ئێمشەو بەو تەور دیم وە چەم
ڕوئیای عەبدوڵڵا بێ زیاد و کەم
ئەمیر فازڵ ئەڵماس کانی
«جامع الأوراقعەرەبی» وەحی ڕەببانی
شەمع شەهیدان شاهـ ڕۆشن زەین
کان حەیا و حێلم یانی «ذي النورينعەرەبی»
وات بە خوڎا منیچ ئێمشەو بە ناکاو
ڕوئیای عەبدوڵڵا یەکسەر دیم نە خاو
چارومین ئەمیر شای دوڵدوڵ سوار
شێر ئێبن عەم موستەفای موختار
وات من هەم ڕوئیای عەبدوڵڵا تەمام
ئێمشەو دیم نە خاو وە ئایەی کەلام
قەوڵێ جبرەئیل تەشریفش ئاوەرد
حەزرەت جە ئەزان بەو تەور ئێعلام کەرد
جەو دما حەزرەت موستەفا و یاران
قەرار دان ئەزان پەی ڕۆزگاران
بە ئەمر خوڎا و ئێزن پێغەمبەر
بێلال شی وە بان بوڵەندی مێنبەر
هۆرکێشا سەڎای «الله اكبرعەرەبی»
وانا حەمد زات دانای دادگەر
جە هەژدە فەرسەخ سەڎای ئەو ویەرد
کلیسا و کنشت یەکسەر خامۆش کەرد
هەر ئەو ئەزانەن خوڎای لایەنام
قەرار دا مەندەن پەی دین ئێسلام