ذکر فوت ولید ابن مغیره عم ابوجهل، از مکه به جانب دوزخ شتافت، ثنادید قریش بود
لە کتێبی:
روضة الصفا
بەرهەمی:
میرزا عەبدولقادری پاوەیی (1850-1910)
3 خولەک
466 بینین
وەلید بەدبەخت لەعین بەد کار
ئێبن موغەیرە پەلید ناخار
عومر خەبیسش وە ئاخر یاوا
فەریادش مەکەرد سوب تا خوەر ئاوا
جە غەرغەرەی مەرگ هەر جێزعش مەکەرد
پەی پەی مەکێشا هەناسان سەرد
تا ئەبووجەهل پەرسا کە ئەی عەم
پەی چێش تۆ ئەوند وێت مەدەی وە غەم
ئێزتێراب تۆ سەبەب نە چێشەن
پەنەم واچە ڕاست دڵ وە ئەندێشەن
وات وەڵڵا ئێشم نە تۆی جەرگ نیەن
جێزعم هەم جە خۆف بیم مەرگ نیەن
لاکێن مەتەرسوون چەرخ ڕۆزگار
دین موحەممەد کەرۆ ئاشکار
زاهێر بۆ تەمام جەی سەرزەمینە
مەککە هەم ببۆ وێنەی مەدینە
وەرنە من باکم جە مەردەن نیەن
چوونکە زاد و مەرگ هەر ئەزەڵ بیەن
تا ئەبووسوفیان کەردش دەڵاڵەت
وات خۆفت نەبۆ بویەر جەو حاڵەت
من زامن هەرگێز جە مەککەی تاهێر
دین موحەممەد هیچ نەبۆ زاهێر
ئەجەڵ پەی مەرگش ناگا بی نازڵ
ڕووحش وە مالک دووزەخ بی واسڵ
سا چەند وەقایع ساڵ نخوستین
ڕوو دا نە هێجرەت نە ڕووی سەر زەمین
یەک ڕۆ جە بیروون مەدینەی ئاوا
گورگێ وە گەللەی یەهوودی یاوا
ناگا هەڵمەت دا گووسفەندێ بەرد
چووپان نە شۆنش خەیلێ هانا کەرد
چووپان وە چەوگان خودپەسەندەوە
دەردەم ئەو گووسفەند جە گورگ سەندەوە
گورگ بە ئەمر حەق ئاما بە زەبان
ڕووی خەتابش کەرد جەودەم وە چووپان
واتش ڕزقێ خاس پەی وێم بەردە بێ
خوڎاوەند بە من عەتاش کەردە بێ
ئاخر تۆ وە زۆر ستانای جە من
عەجایب زڵمێ نمانای بە من
چووپان وات ڕاعی نەکەی فەرامۆش
کێ حەرف گورگش شنەفتەن وە گۆش
کەسێ نەدیەن جە ڕۆزگاران
گورگ کەرۆ تەقریر خاستەر جە یاران
گورگ واتش چووپان عەجەبتەر ئێڎەن
شەخسێ ها جەی زێد یاگەی ئومێدەن
جە نەخلستانم نە بەین دوو کۆ
شێوەی ڕەسوڵیش ڕۆشنەن چوون ڕۆ
هەر چ جە ئێوە جەی وەر ویەردەن
یا خۆ جەی دما هەرچیتان کەردەن
ئەو مەڎۆ خەبەر یەک یەک جە یاران
ئاگان جە کەردەی گوزەشتە کاران
ئێوە بێ باوەر چوون دڵ جە سەنگن
یا مەست شەراب، خەرفیای بەنگن
سا هەر کەس ئیمان بە ئەو ناوەرۆ
جە دین و دنیا زەرەر ماوەرۆ
چووپان دەر ساعەت ڕاگەش گێرت نەوەر
یاوا وە حزوور شای «خیر البشر»
کەلێمەی شاڎەت ئاوەرد بە زەبان
واتش یا ڕەسوول ئامان سەد ئامان
من مەرد چووپان بیابان گێڵم
شەو چەنی حەیوان تا بەیان وێڵم
غەرەز، قسەی گورگ سوئال و جواب
یاونا وە سەمع شای فەلەک ڕکاب
بە حەرف چووپان حەزرەت تەسدیق کەرد
فەرما عەلامەت قیامەت ئاوەرد
بەڵێ ئەر یەکێ پا بنیۆ وە پێش
بەرشۆ وە بیروون ئەو جە یانەی وێش
هێمای وە مەنزڵ عەودەت نەکەردە
نام ئەهل و بەیت وێش هەر نەبەردە
هەر چ عەیاڵش کەردە بۆ جەو دەم
بێ ئەندێش جە ماڵ ئەر زیاد یا کەم
نەعلەین جە سەحرا پێش مەدۆ خەبەر
بە ئەمر قودرەت دەهندەی داوەر
ماچۆ عەیاڵت فڵانە کار کەرد
یا فڵان تەعام ها وە بێ تۆ وەرد
ئی واقێعاتە گشت عەلامەتەن
نیشانەی ئامای ڕۆی قیامەتەن