zikir fut wilîd abin miẍîrh ’im abuchil, az mikih bih canb duzix şitafit, sinadîd qirîş bud
Li pirtûka:
Rewzetul Sefa
Berhema:
Mîrza Ebdilqadirê Paweyî (1850-1910)
3 Xulek
486 Dîtin
welîd bedbext le’în bed kar
êbin muẍeyre pelîd naxar
’umir xebîsiş we axir yawa
feryadiş mekerd sub ta xwer awa
ce ẍerẍerey merg her cêz’iş mekerd
pey pey mekêşa henasan serd
ta ebûcehil persa ke ey ’em
pey çêş to ewind wêt medey we ẍem
êztêrab to sebeb ne çêşen
penem waçe řast dił we endêşen
wat wełła êşim ne toy cerg nyen
cêz’im hem ce xof bîm merg nyen
lakên metersûn çerx řozgar
dîn muḧemmed kero aşkar
zahêr bo temam cey serzemîne
mekke hem bibo wêney medîne
werne min bakim ce merden nyen
çûnke zad û merg her ezeł byen
ta ebûsufyan kerdiş dełałet
wat xofit nebo buyer cew ḧałet
min zamin hergêz ce mekkey tahêr
dîn muḧemmed hîç nebo zahêr
eceł pey mergiş naga bî naził
řûḧiş we malk dûzex bî wasił
sa çend weqay’ sał nixustîn
řû da ne hêcret ne řûy ser zemîn
yek řo ce bîrûn medîney awa
gurgê we gelley yehûdî yawa
naga hełmet da gûsfendê berd
çûpan ne şonş xeylê hana kerd
çûpan we çewgan xudpesendewe
derdem ew gûsfend ce gurg sendewe
gurg be emir ḧeq ama be zeban
řûy xetabiş kerd cewdem we çûpan
watiş řizqê xas pey wêm berde bê
xuđawend be min ’etaş kerde bê
axir to we zor sitanay ce min
’ecayb ziłmê nimanay be min
çûpan wat řa’î nekey feramoş
kê ḧerf gurgiş şineften we goş
kesê nedyen ce řozgaran
gurg kero teqrîr xaster ce yaran
gurg watiş çûpan ’ecebter êđen
şexsê ha cey zêd yagey umêden
ce nexlisitanim ne beyn dû ko
şêwey řesułîş řoşnen çûn řo
her çi ce êwe cey wer wiyerden
ya xo cey dima herçîtan kerden
ew međo xeber yek yek ce yaran
agan ce kerdey guzeşte karan
êwe bê bawer çûn dił ce sengin
ya mest şerab, xerfyay bengin
sa her kes îman be ew nawero
ce dîn û dinya zerer mawero
çûpan der sa’et řageş gêrit newer
yawa we ḧizûr şay «xîr albişir»
kelêmey şađet awerd be zeban
watiş ya řesûl aman sed aman
min merd çûpan byaban gêłim
şew çenî ḧeywan ta beyan wêłim
ẍerez, qisey gurg su’al û cwab
yawna we sem’ şay felek řikab
be ḧerf çûpan ḧezret tesdîq kerd
ferma ’elamet qyamet awerd
bełê er yekê pa binyo we pêş
berşo we bîrûn ew ce yaney wêş
hêmay we menził ’ewdet nekerde
nam ehil û beyt wêş her neberde
her çi ’eyałş kerde bo cew dem
bê endêş ce mał er zyad ya kem
ne’leyn ce seḧra pêş medo xeber
be emir qudret dehnidey dawer
maço ’eyałit fiłane kar kerd
ya fiłan te’am ha we bê to werd
î waqê’ate gişt ’elameten
nîşaney amay řoy qyameten