ذکر عرضه کردن سید کائنات ﷺ خود را بر زوار حرم و آمدن اهل مدینه به مکه و ایمان آوردن چند نفر از آن قوم محترم
لە کتێبی:
روضة الصفا
بەرهەمی:
میرزا عەبدولقادری پاوەیی (1850-1910)
3 خولەک
451 بینین
بەڵێ چوون حەزرەت پاک پێغەمبەر
شفا خوای ئوممەت ڕۆی دەشت مەحشەر
جە وەخت حەج و عومرەی موکەڕەم
مەشی وە لای قەوم حوجاج حەرەم
وە هەر قەبایل پەنا مەبەردش
مەتڵەبات وێش ئێزهار مەکەردش
شایەد مەئزوون بۆ بشۆ وە لاشان
ئەمین بۆ دایم وە هەوا خواشان
جە گشت بابەتێ جە ڕۆزگاران
جە شەڕ ئەعدا نگاش بداران
تا تەبلیغ دین حەق موحکەم کەرۆ
ئەمر ڕێسالەت وە جا باوەرۆ
هەر چەند ئێلتێماس مەکەرد و ئەندێش
هیچ کام ئەو تەدبیر قەبووڵ نەکەرد لێش
واتن قەوم وێش گشت بە ئەو دانان
ئەوان جە ئێمە خاستەر مەزانان
ئەو ساڵە ویەرد وە پەڕاکەندە
تا یاوا بە وەخت ساڵ ئایەندە
تا کە خوڎاوەند سەهل کەرد کارش
ڕەواج دا قوماش مایەی بازارش
جە ئەهل یەسرێب وە بێ چوون و چەند
شەش نەفەر یانێ شەش سەعادەتمەند
شین وە زیارەت وە کەعبەی شەریف
کەردشان تەواف بارەگای زەریف
ئێسم پاک ئەو سەعادەتمەندان
یەک یەک بەیان کەم چوون دەفتەر داران
ئەوەڵ جار «اسعد ابن ضرارهعەرەبی»
تەنها موبارێز سپای هەزارە
«عوف بن حارث ابن غفرانعەرەبی» بێ
سالێسەن «رافع ابن عجلانعەرەبی» بێ
چەهاروم «قطبة ابن عامرعەرەبی» بێ
پەنجوم «عقبة ابن جابرعەرەبی» بێ
ششوم هەم «جابر» عالیجەناب بێ
«ابن عبدالله ابن ربابعەرەبی» بێ
جە عەقەبەی پاک ئەو هەر شش نەفەر
یاوان وە خدمەت شای «خیر البشر»
خواجەی کائێنات تا پەرسا لێشان
جە ئەسڵ و نەسەب جە ماوا و جێشان
عەرز کەردن ئێمە خەڵق مەدینەین
قەبیلەی خەزرەج، قەوم ڕۆشن زەین
حەزرەت فەرماوا ساتێ وە بێ خەم
بادا جەی گۆشە بنیشین وە هەم
واتشان بەڵێ ئەو هەر شش نەفەر
نیشتن نە زەمین چەنی پێغەمبەر
ئەوەڵ فەرمایش جە نبووەت کەرد
وە ئەتباع دین ئەوان دەعوەت کەرد
چەند ئایەی قورئان پەرێشان وانا
تا کە جە هەر شش بوڵەند بی هانا
واتشان ئی شەخس «عظيم الشانعەرەبی»ەن
بە خوڎا، پێغەمبەر ئاخر زەمانەن
عولەمای یەهوود یەک یەک دان خەبەر
زهوورش کەردەن خاتەم پێغەمبەر
مەعلووم بۆ لێتان پێغەمبەر وێشەن
موهر و نیشانەی نبووەت پێشەن
وەر جە مەدینە با سبقەت کەرین
ئیمان بە حەزرەت ڕەسوول باوەرین
چوونکە دڵ وەش بین ئیمان جایز
هەر شش بە دەوڵەت ئیمان بین فایز
نام خوڎاوەند وە حەق بەردشان
دین موحەممەد قەبووڵ کەردشان
جە نۆ عەرز کەردن «يا خير البشرعەرەبی»
جە ڕووی مەرحەمەت ئێمە ڕوخسەت دەر
تا بشین وە لای قەبیلەی وێمان
جە سایەی تۆ گشت موتیعەن پێمان
تایفەی خەزرەج هەر چی هەن تەمام
بەڵ باوەریمشان وە دین ئێسلام
شای «خیر البشر» ڕوخسەت دا پێشان
تەشریفشان بەرد وە ماوای وێشان
ئایین ئێسلام ئاشکار کەردن
سوجدەی خوڎاوەند بێ هەمتا بەردن
ئەوسا بە حەزرەت شای «خير الأنامعەرەبی»
مەکەردن پەیغام هەر سوب تاکە شام
تایفەی خەزرەج گشت ئیمان ئاوەرد
دین پێغەمبەر وە دڵ قەبووڵ کەرد