استفسار ابوطالب از حضرت نبوی از آئین او و مأذون داشتن علی (كرم الله وجهه)
لە کتێبی:
روضة الصفا
بەرهەمی:
میرزا عەبدولقادری پاوەیی (1850-1910)
3 خولەک
530 بینین
والێدەی عەلی فاتێمەی خوشبەخت
جە ئەبووتالب سوئال کەرد بە سەخت
واتش جە عەلی نەداری خەبەر
جە دین ئەجداد وێش شیەن وە بەر
جە تۆ و جە ئایین قەدیم ویەردەن
دین موحەممەد ئێختیار کەردەن
یە خەیلێ عەیبەن پەرێ شەئن تۆ
فەرزەند بەو تەورە نا خەلەف ببۆ
ئایین مەحکەم نەکێشۆ وە کێش
بەر بشۆ جە دین جەدد و ئابای وێش
تۆ بە تەحەککوم جێش قەبووڵ مەکەر
فەرما باوەرەش بدەش گا وە سەر
ئەبووتالب وات وەسەن ئەفسانە
هەنی جەی فێشتەر ئەفسوون مەوانە
چوون عەلی ئەمرێ خەلاف نەکەردەن
سوجدەش وە خوڎای موحەممەد بەردەن
بە خوڎا موحەممەد دین حەق دارۆ
پەی چێش؟ پێغەمبەر ئوممەتەن ئارۆ
تا ئەبووتالب یەک ڕۆ جەی خەبەر
شی پەی دڵگوشای قەسر پێغەمبەر
بزانۆ عەلی بە چێش مەشغووڵەن
ئەسڵ عەقیدەش بە کام ئوسووڵەن
حەزرەت جەو دەمدا جە نەخلەی شەریف
نە پای ئەو تەلار مەرتەبەی زەریف
چەنی شای مەردان ساعەت بە ساعەت
ئەدا مەکەردن نمای جەماعەت
ئەبووتالب دیش حەیران مەند جە کار
پەرسا جە حەزرەت شای بوڕڕاق سوار
وات یا موحەممەد عەتر و عەنبەر بۆ
یە چ سنعەتەن کەردەنت وە خۆ؟
حەزرەت دا جواب بەو گوفتارەوە
بەو ڕێزەی ڕازان شەکەر بارەوە
واتش یا عەممی ئینە خەڵاتەن
جبرەئیل ئاوەرد خوڎاوەند واتەن
ڕۆشنی ڕای چۆڵ جادەی شەفامەن
حوججەت وە ئێسبات ئەهل ئێسلامەن
هەم کلید قوڵف قاپی بەهەشتەن
سەرمایەی سەیران سەفا و گوڵگەشتەن
جە دنیا سێحەت جەستە و قامەتەن
مایەی ئازادی ڕۆی قیامەتەن
سا بۆ تۆ هەم دین ئێسلام قەبووڵ کەر
ئیمان بە خوڎای لایەزال باوەر
بە خوڎا مەنزوورم هەر ئێڎەن ئەی عەم
بڵێسەی دووزەخ نەوینی وە چەم
ئەبووتالب وات دینت سەریحەن
فەرموودەت حەققەن قەوڵت سەحیحەن
بەڵام من جە دین جەدد و ئابای وێم
بەر نمەشوون سا، هەر چی مەیۆ پێم
«عبدالمطلب» هەر دینێ داشتەن
بەزر ئەو زەرعە بە من گوزاشتەن
تەبەڕڕام نیەن من جە دین ئەو
تا مەحشەر هەر هام نە ئایین ئەو
بەڵام تۆ هەم من وە غەیر مەشمارە
دایم دین وێت مەحکەم بڎارە
هەر چی جبرەئیل حوکمش ئاوەردەن
خوڎاوەند وە تۆ چێش ئێزهار کەردەن
ئەمر و حوکم حەق گشت وە جا باوەر
جە عەدووی قورەیش زەڕە خۆف مەکەر
جە گرۆی دوشمەن هیچ نەبۆت ئەندێش
کەس حەددش نیەن پا بنیۆ نە پێش
هەر تا من زێندەی ڕووی سەر بەساتم
دایم پشتیبان پشت دەرگاتم
ئموورات وێت وە «حسب الخوا»ی دڵ
مورادت تەمام گشت بکەر حاسڵ
فەرما هەم عەلی دینش دین تۆن
هام ڕاز و هام قەوڵ هام نشین تۆن
مەبۆ جە ئەمرت بەر نەشۆ وە بەر
غوڵام تۆ بۆ تا «يوم المحشرعەرەبی»
جەعفەرم جە نۆ مەئزوون کەرد ئارۆ
دین تۆ نە دڵ مەحکەم بدارۆ
عەقیل هەم مەردێ شیرین خۆ مەبۆ
ئەویچ هەر تابع دین تۆ مەبۆ
جە تەقویەتت وێم «حتى المقدورعەرەبی»
کۆتاییم نیەن جە نزا و جە دوور