در بیان منجمان مربوط و تصویر آنچه طالع آن محبوب لایموت
لە کتێبی:
روضة الصفا
بەرهەمی:
میرزا عەبدولقادری پاوەیی (1850-1910)
3 خولەک
621 بینین
«عبدالمطلب» یەک ڕۆ بێ ئەندێش
مونەججیمان گشت بەرد وە حوجرەی وێش
پەی زێکر تەسویر خانەی بورووجات
زایندەی تالع خواجەی کائێنات
کەوکەب شوماران کەردشان حەساب
دڵ دان وە نجووم زیج وە ئوستورلاب
ئێسم موحەممەد چەنی مەولوودش
بەخت هومایوون بینای وجوودش
هەر چوار چەنی چوار بورج سەعید
شەمس و قەمەر و بورجەین ناهید
مدران موتتەفیق هەر هەشت جە یەک تاق
جە خانەی میزان پەی سەیر ئافاق
چوون ئەهل ڕیاز تەسنیف تەرقیم
دانای دەقایق گوویەندەی تەقویم
جە دمای تەحقیق مەسئەلەی موشکڵ
تەسدیق کوللی کەردشان حاسڵ
واتشان تالع ئەو تفڵ سەروەر
تەمام فەرخوندەن، بەرزەن، مونەووەر
چوونکە جە بیستەم دەرەجەی جودی
ئێتتێفاق کەوتەن نەجم ئەحمەدی
دین قەیومش جە نۆ عایێدەن
«يوماً قيوماًعەرەبی» جە تەزایودەن
مەرتەبەی عالیش خەیلێ عەزیمەن
تا ڕۆی قیامەت هەر موستەقیمەن
نیشانەی سەعید ئەو نیکوو ئەختەر
تالعش میزان مەولوودش قەمەر
بە دەلیل شەمس زوهرە و عەتارد
هەر سێ چوون وە بورج عەقرەب بین وارد
زایچەی تالع هومایوون ئەو
چوون بەدر کامڵ درەخشان جە شەو
مەعلووم بی تالع ئەو شای تینەت پاک
موخاتەب بە دەنگ خەتاب لەولاک
کەوکەب شوماران دانەندەی ئەخبار
«عبدالمطلب» کەردن خەبەردار
واتشان فەرزەند ئەرجومەند تۆ
فەرمان فەرمای دەور دەهر دوون مەبۆ
جە لوتف بێ چوون زات ئێلاهی
ڕەفێقش نیەن جە مە تا ماهی
فەڵەک نەردەبان، مەلەک بەندەشەن
شەهنشاهان گشت سەر ئەفکەندەشەن
ئەهل جن و ئێنس مەخلووقات یەک سەر
وحووش و تیوور جوملەی زی بەشەر
گشت مەحکووم حوکم کەس نەدارشەن
موتیع ئایین بەر قەرارشەن
هەر کەس جە فەرمان ئەمر ئەو سەروەر
جە بەد بەختی وێش پا بنیۆ نە وەر
نەکەرۆ حەڵقەی غوڵامیش نە گۆش
جە فەرموودەی ئەو ببۆ فەرامۆش
بە تێغ قەهرش سەرنگوون مەبۆ
ئەرواش وە دووزەخ توونا توون مەبۆ
جە بابا ئادەم تا عیسای مەریەم
ئەنبیاهان گشت تەمام و سەرجەم
بە سەنگ قەزا و ترازووی قەدەر
ئەوان گشت جەو سەر موحەممەد جەی سەر
وەختێ کێشاشان نەک بەرانبەر بی
موحەممەد جە گشت بەڵ گرانتەر بی
جە دایرەی چەرخ میزان کەوکەب
دنیا و مافیها عەجەم تا عەرەب
وەی تەور جە لای حەق ئافەرید بیەن
کەس جە موحەممەد باڵاتەر نیەن
حەق مەحبووبێ تەر چوون حەبیب وێش
خێلقەت نەکەردەن بینای بێ ئەندێش
دەروونش دەریای بەحر عەممانەن
یەقین پێغەمبەر ئاخر زەمانەن
«عبدالمطلب» سوجدەی شوکرش بەرد
ئەهل کەواکێب یەک یەک خەلعەت کەرد
جەو دما خێزا دڵ وەش، بێ وێنە
تا شی وە مەنزڵ قەسر ئامینە
حەزرەت ستانا گێرتش نە باوۆش
وێنەی دەستەی گوڵ بۆ نیا وە بۆش
گفتوگۆی وێش و ئەخبار کەوکەب
بەیان کەرد پەرێ ئامینەی وەهەب
واتش ئی فەرزەند خەیلێ پەسەندەن
تەمام موکەڕڕەم سەعادەت مەندەن
مەنمانەش وە خەڵق جە ڕۆزگاران
حێفزش کەر جە تیر دیدەی بەڎکاران
شەوان تا وە ڕۆ غافڵ نەبی لێش
نەوا زەحمەتێ ناگا یاوۆ پێش
«عبدالمطلب» خەیلێ بێ وێنە
کەردش گفتوگۆ چەنی ئامینە