سۆفیگەری بە زمانی دڵدارییەوە
لە کتێبی:
دیوانی میرزا غەفوور
بەرهەمی:
میرزا غەفوور (1870-1938)
1 خولەک
456 بینین
ئەوا دڵ بوو بە بریانی، خودا ڕەحمێ بە حاڵم کەی
بە لوتف و مەرحەمەت، ساتێ ڕەفیقی چاوی کاڵم کەی
بەبێ دۆست و ڕەفیق ماوم، لە پژدەردا بە مەحزوونی
بە ئومێدم کە عەبدی تۆم بە ڕەحمت حوسنی حاڵم کەی
ئەگەر لەم جەژنەدا بمبەخشی و بمکەی بە قوربانی
عەلاماتی شەهیدیمە بە عەفووەت خوون حەڵاڵم کەی
لە سووئی تاڵیعی خۆمدا ئومیدێکم نییە لاکین
بە لوتفی تۆیە مەغروورم، ئەنیسی خەتت و خاڵم کەی
جەلالم بۆ چییە، دنیا هەمووی دامە و خەراباتە
تەمەننایە بە ڕەحمت بادەنۆشی لێوی ئاڵم کەی
ئەگەرچی عاشقی مسکین، لە عالەم شێت و ڕیسوایە
بە ڕیسوایی دەکەم ئەرجوو بە گەردی بای شەماڵم کەی
لە تۆ مەعلوومە مەقسوود و نیاز و ئارەزووی بەندە
ئەگەر فکرێکی سەهووم بێ لە دنیا لەنگ و لاڵم کەی
بە مەرگی خۆم ڕەزامەندم ئەگەر لوتفت مەدەد کا بۆم
بە ڕەحمت کوشتەیی تیری موژەی ئەو چاو غەزاڵم کەی
لەبەر جورم و خەتای زۆرم زوبانی ناتقیم لەنگە
ئیلاهی تۆ بە ڕەحمی خۆت دەبی ڕەحمێ بە حاڵم کەی