خبر پرسیدن شاپور مکان شیرین را
لە کتێبی:
شیرین و خوسرەو
بەرهەمی:
خانای قوبادی (1704-1778)
3 خولەک
642 بینین
دانای خۆش تەقریر ئاڵای سوخەندان
شەممەیێ بێ تەرح بەی تەرح کەرد بەیان
چوون شاپوور چین نادیرەی ڕووی دەور
ساکن بی نەو دەیر کەشیشان گەور
جە شەخسێ پڕ هۆش دانای شەکەر ڕێز
پەرساش ئەحواڵات شیرین پەروێز
ئەو شەخس پڕ زەین شیرین ڕیوایەت
کەرد پەرێ شاپوور بەی تەور حیکایەت
واتەش نە دامان ئەو دەیرەن غارێ
هەن تێشدا جە سەنگ سیا سوارێ
هەر ساڵ ماینێ شۆخ خۆش ڕەفتار
مەیۆ بە داوان مشۆ بە ئەو غار
جە قەزا بەو غار تا کە میاوۆ
وێش بەو سەنگ سەخت سیا مساوۆ
بە ئەمر فەرمان زات «ذا المننعەرەبی»
دەر ساعەت مبۆ جە سەنگ ئابوستەن
هەر ئەسپێ جە نەسڵ ئەو سیا سەنگەن
تەمام خۆش تەرکیب، خۆش ڕەفتار ڕەنگەن
سەختتەرەن سوممش جە سەنگ خارا
یەکسانەن جە لاش کەش و کۆ و سارا
بە واتەی ئەسحاب پڕ عەقڵ و فەرهەنگ
ماچان «شەبدێز»ەن جە توخم ئەو سەنگ
تەعەججوب ئیدەن ئەر سەنگێ جەو غار
هۆرگێری دەرلاد مبی سەنگسار
تەختێ هەن نە پێش ماچان «ئەلحەراق»
وەسیعتەر جە چەرخ چەمەریی شەش تاق
عەجەبتەر ئێدەن جە پای ئەو غاردا
ئەو غار پڕ سەیر ئاب و گوڵزاردا
تێشدان یەک سەرێ کەفتەن سیا ڕەنگ
ها نە دەورشان دووسەد سێسەد سێسەد سەنگ
چمان ڕەختشان وەسەر خۆم ڕشتەن
سێڵاو مەینەت پێشاندا ڕشتەن
مەعلووم بۆ جە لای عارفان دەور
دانا بزورگان شیرین تەرز و تەور
خالقێ کە زات پاکش بێچوونەن
نیگارەندەی نەخش چەرخ گەردوونەن
عیبرەتش فرەن باب سەیرانەن
دانا جە کردەش دایم حەیرانەن
هەرکەس نەگێرۆ عیبرەت جە کارەش
بەدتەرەن جە خرس، مەبین دیدارەش
«خانا» ڕاستەن وەسف «حَي لا يَنامعەرەبی»
فەرزەن پەی زومرەی ناجیەی ئیسلام
بەڵێ جارێ بۆ وێنەی «نیزامی»
شوعەرای شیرین نەزم نادیرەی نامی
بە ڕەحش میداد خامەی عەنبەرین
بیناکەر داستان شاپوور و شیرین
پەی چێش، کە خوسرەو ئینتیزارشەن
جە سەوداش سەد کۆی مەینەت بارشەن
چون شاپوور جەو شەخس جیهاندیدە کار
تەعریف شەبدێز شنەفتش بەی تار
بە چیهرەی ڕوودا دەستەی زوڵف شەو
پەخش بی چون دووی هەناسەی خوسرەو
نمانا زوڵمەت چیهرەی سەودای
سیاتەر جە بەخت «خانای قوبادیناسناوی ئەدەبی»
ئەو شەو نەو دەیردا تا وە سوبح دەم
و یاران چەنی گەوران وە بێ خەم
چون سەحەر جە نوور خورشید ئەنوار
سەرکوان پۆشان نەمەشەی گوڵنار
سەرهەنگ زوڵمەت گورێز کەرد بە دەو
گێڵا بە قاقوم سموڕ پۆش ئەو