کشیدن شاپور صورت خوسرو را نوبت اول
لە کتێبی:
شیرین و خوسرەو
بەرهەمی:
خانای قوبادی (1704-1778)
3 خولەک
606 بینین
نەققاش تەڕدەست نادیرەی چینی
بەخشا وە خورشید بە دەور ڕەنگینی
پەرساش جە پیران ئەو دەیر دێرین
سەیرانگەی نیشات فەڕبەخش شیرین
واتش ئاور جای نیشاتش کامەن
عەزمەش سەیر کام جاگە و مەقامەن
واتشان ئاور ئەو شای شەکەر ڕاز
جەنی خاڵ خاسان نازک غەمزە و ناز
ئەو فەزای فەڕبەخش پاکیزای پڕ نوور
نیشات گاشانەن دیارەن جە دوور
شاپوور نەخشبەند دانای هونەروەر
وەرتەر جە نزوول شیرین دڵبەر
خاستەر جە مانیی دڵ جە گوهەر پەڕ
کێشا خامەی موو جە مەحفەرەی زەڕ
بە تەڵا و شەنگەرف نوقرە و لاجیوەرد
بە چەند ڕەنگ شۆخ زەعفەران زەرد
تەسویر پەروێز پڕ سام لاڵ بەخش
نە قەتعەی کاغەز مەرجانی کەرد نەخش
هەر بەو شێوە و شکڵ دڵ پەسەندەوە
بەو تاج و تۆمار دانە بەندەوە
چون نەسیم یاوا بەو جا بە جەختێ
ئاوێزانش کەرد نە پای درەختێ
ئوستاد تەڕ دەست بە یەک درەنگێ
وستش بساتێ بە شێوە و ڕەنگێ
دەرلاد نە جایێ جیهاندیدەی فەرد
وێش چون تایفەی پەری نیهان کەرد
جەو دەما شیرین شای سۆسەن خاڵان
چەنی سوپا و سان نازک نەوهاڵان
بە دەوڵەت بەو جا تەشریف ئاوەردەن
گەڵا جە گوڵزارموشەڕەف کەردەن
دەر دەم نازاران ڕشتەی ئیلاهی
کەردشان وە پا سەیوان شاهی
وستشان جە شاخ ڕەیحانە و سونبوڵ
جە بەرگ نەسرین شەقایق و گوڵ
فەرشێ پەی شیرین شۆخ شیرین ڕەنگ
خاستەر جە دێبای کارخانەی فەرەنگ
شەکەر لەب بە سەد لارە و لەنجەو و ناز
نیشت وە باڵای فەرش گوڵان بە ئەنداز
فەرماش تا ساقیی سادەی سیم ئەندام
لەبڕێز کەرد قەدح جە بادەی گوڵ فام
نۆشاشان ڕەندان زوڵف بۆ عەنبەرین
پەیاپەی پەیوەست بە شادیی شیرین
سا کە سەرشار بین جە بادەی گوڵ گوون
بە ئاهەنگ ساز نەغمەی ئەرغەنوون
نە ڕووی فەرش گوڵ مەست مەست بە ئەنداز
گرتشان چۆپی وێنەی جۆپی باز
تا چەندێ ئەو پۆل ئاڵای خاڵ خاسان
ڕەقسان بین جە زەوق وێنەی ڕەقاسان
ئاخر کە شیرین وێنەی شەمع نوور
دیش سوورەت بەندێ دیارەن جە دوور
واتش بە شەخسێ ئەو شۆخ ڕەندە
تا ئاوەرد پەرێش ئەو سوورەت بەندە
شیرین جە سوورەت شۆخ عەجەب ڕەنگ
حەیران بی چون نەقش سوورەت نە ڕووی سەنگ
ئاشفتەی بی زوڵف بۆ عەنبەرینش
گێڵیا جە ڕەنگ شێوەی شیرینش
جە عەشقش بەو تەور دەروونش دا جۆش
وێنەی شەرابی یەکسان بی مەدهۆش
لەرزا جە هوجووم سەودای ئەو دوڵبەر
چون گوڵ جە نەسیم وادەی سوب سەحەر
چون مەیکەش جە مەی تەمام بی مەستش
ڕشتەی ئختیار بەرشتی جە دەستش
بنازوون بە کار چەرخ مینا ڕەنگ
هەر بە مەحز سەیر سوورەتێ بێ دەنگ
شەخسێ چون شیرین ساحێب عەقڵ و فام
چەیش کەرد لێوە و ئاشفتە و سەرسام
نازداران شۆخ زوڵف دەستە دەستە
دیشان کە شیرین بەو حاڵ و جەستە
سەندشان جە دەست ئەو لەیلێ چارە
دەرسات ئەو سوورەت کەردسان پارە
واتەن یە سیحرەن، دەستکار دێوەن
دێو پڕ مەکر و فەند عالەم فرێوەن
ئێد واتن، دەرسات سەیوان شاهی
بار کەردن، جە ترس دەرلاد بین ڕاهی
جە شۆڕەزارێ وەخت نمای شام
باز بە شادی و عەیش گرتشان ئارام