kişîdin şapur surit xusru ra nubit awil
Li pirtûka:
Şîrîn û Xusrew
Berhema:
Xanayê Qubadî (1704-1778)
3 Xulek
578 Dîtin
neqqaş teřdest nadîrey çînî
bexşa we xurşîd be dewr řengînî
persaş ce pîran ew deyr dêrîn
seyrangey nîşat feřbexiş şîrîn
watiş awir cay nîşatiş kamen
’ezmeş seyr kam cage û meqamen
watşan awir ew şay şeker řaz
cenî xał xasan nazk ẍemze û naz
ew fezay feřbexiş pakîzay piř nûr
nîşat gaşanen dyaren ce dûr
şapûr nexşibend danay hunerwer
werter ce nizûl şîrîn diłber
xaster ce manîy dił ce guher peř
kêşa xamey mû ce meḧferey zeř
be teła û şengerf nuqre û lacîwerd
be çend řeng şox ze’feran zerd
teswîr perwêz piř sam lał bexiş
ne qet’ey kaẍez mercanî kerd nexiş
her bew şêwe û şikił dił pesendewe
bew tac û tomar dane bendewe
çun nesîm yawa bew ca be cextê
awêzanş kerd ne pay dirextê
ustad teř dest be yek direngê
wistiş bisatê be şêwe û řengê
derlad ne cayê cîhandîdey ferd
wêş çun tayfey perî nîhan kerd
cew dema şîrîn şay sosen xałan
çenî supa û san nazk newhałan
be dewłet bew ca teşrîf awerden
geła ce gułzarmuşeřef kerden
der dem nazaran řiştey îlahî
kerdişan we pa seywan şahî
wistişan ce şax řeyḧane û sunbuł
ce berg nesrîn şeqayq û guł
ferşê pey şîrîn şox şîrîn řeng
xaster ce dêbay karxaney fereng
şeker leb be sed lare û lencew û naz
nîşt we bałay ferş gułan be endaz
fermaş ta saqîy sadey sîm endam
lebřêz kerd qediḧ ce badey guł fam
noşaşan řendan zułf bo ’enberîn
peyapey peywest be şadîy şîrîn
sa ke serşar bîn ce badey guł gûn
be aheng saz neẍmey erẍenûn
ne řûy ferş guł mest mest be endaz
girtişan çopî wêney copî baz
ta çendê ew pol ałay xał xasan
řeqsan bîn ce zewq wêney řeqasan
axir ke şîrîn wêney şem’ nûr
dîş sûret bendê dyaren ce dûr
watiş be şexsê ew şox řende
ta awerd perêş ew sûret bende
şîrîn ce sûret şox ’eceb řeng
ḧeyran bî çun neqiş sûret ne řûy seng
aşfitey bî zułf bo ’enberînş
gêłya ce řeng şêwey şîrînş
ce ’eşqiş bew tewr derûnş da coş
wêney şerabî yeksan bî medhoş
lerza ce hucûm sewday ew dułber
çun guł ce nesîm wadey sub seḧer
çun meykeş ce mey temam bî mestiş
řiştey ixtyar beriştî ce destiş
binazûn be kar çerx mîna řeng
her be meḧiz seyr sûretê bê deng
şexsê çun şîrîn saḧêb ’eqił û fam
çeyş kerd lêwe û aşfite û sersam
nazdaran şox zułf deste deste
dîşan ke şîrîn bew ḧał û ceste
sendişan ce dest ew leylê çare
dersat ew sûret kerdisan pare
waten ye sîḧren, destikar dêwen
dêw piř mekir û fend ’alem firêwen
êd watin, dersat seywan şahî
bar kerdin, ce tirs derlad bîn řahî
ce şořezarê wext nimay şam
baz be şadî û ’eyş girtişan aram