قەسیدەی ڕابیتە و بیرکردنەوە لە مردن و حەشر و میزان
لە کتێبی:
دیوانی خادیم (بەرگی ٢)
بەرهەمی:
خادیم (1895-1953)
2 خولەک
1018 بینین
ئیمشەو لە جۆشی پیر و نەخۆشی
دڵ ساتێ نەیبوو قەرار و خۆشی
نیشانەی مەرگم سەر و ڕیش سپی
لە جۆشی خەیاڵ دڵم داتەپی
ڕابیتەی مردن کەوتە خەیاڵم
لەو کاتە جۆشام پەشۆکا حاڵم
نە زەخیرەم بوو نە دەستمایەی
نە بەدەن بەرگی، نە سەرم سایەی
ڕووت و بێنەوا، موفلیس و بێکەس
هەر ئەتۆم کەسی ئەی فەریادڕەس
کۆچی دواییمە کاتی وەفاتم
چاوەڕێی ڕەحم و لوتف و وەفاتم
لە کاتی مردن نەکیر و مونکیر
هاتنە سەر سەرم پێیان دام خەبەر
کێ ئەناسی تۆ؟ تۆشەت چی پێیە؟
جێگە و مەرجەعی ئیلتیجات کێیە؟
گوتم ئەم جێگە ئاستانەی شایە
هەزار سواڵکەری وەک منی تیایە
ئەمە دەرگاهی شاهی شاهانە
بۆ هەموو کەسە ئەم سفرە و نانە
میوانی غەریب کەرەم سەرای شام
موحتاجی ڕیرەی سفرەی ڕجای شام
تۆشە بۆ دەرگای کەریمان بردن
بۆ گەدا عەیبە کاری وا کردن
تەرازووی خێرە لە سارای مەحشەر
سووک و بێ مایە، موفلیس بوو یەکسەر
لە حاکمی موتڵەق خیتاب هاتە گوێم
موژدەی عەزابی ئەبەد درا پێم
سەدای «ٲخستواعەرەبی» زۆر چاک هاتە گوێم
لە ترس و هەیبەت نەمزانی لە کوێم
گوتی شەفیعت ئیمڕۆکە کێیە؟
ئومێدت چییە بە لوتفی کێیە؟
گوتم شەفیعم شەرمەزاریمە
لە جۆشی خەجڵەت گریە و زاریمە
کەوتەوە یادم ئومێدێکی وا
لە ئاگری دۆزەخ نەجاتم بدا
ئومێد و هیوام، لوتفی تۆیە بەس
تۆی خزم و کەسی هەژار و بێکەس
تۆ شا و من گەدا، هاتوومە دەرگات
منی مات و لات هاتوومەتە لات
بۆ گەدا و سواڵکەر کێ ئەکا بڕوا
لە دەرگەی شاهان بەبێ بەش بڕوا
دەریای مەرحەمەت مەوجی دا یەکجار
دایپۆشی یەکسەر هەر گۆشە و کەنار
لە سیفاتی کەریم کەرەم پەیدا بوو
سارایی مەحشەر، پڕ لە سەما بوو
ئاگری دۆزەخ بە ئەمری جەلیل
بوو بە گوڵستان وەک ئاگری خەلیل
«خادیمناسناوی ئەدەبی» موحتاجە سەخای کەریمان
بۆ گەدا و موفلیس هەم بۆ هەتیوان