عومری شیرینم بە تەڵخی بوو لە ڕێگەی تۆ، تەلەف
لە کتێبی:
دیوانی سالم
بەرهەمی:
سالم (1800-1866)
1 خولەک
534 بینین
عومری شیرینم بە تەڵخی بوو لە ڕێگەی تۆ، تەلەف
سا جەفا تا کەی، وەفا کە، بێ لە ڕێی شاهی نەجەف
گۆزەگەر حەتتا تەماعی پێ نییە، وا کەوتووە
ڕووی تەڵاڕەنگم بەبێ حورمەت لە خاکا وەک خەزەف!
بارشی نیسانی لوتفت چونکە هاتە بەحری غەم
کەوتە دڵ عیشقت وەکوو لوئلوء لەناو قەلبی سەدەف
قەد گورێز نادەم لە بەیعی لەعلی ڕومانیی لەبت
تا لە بازاڕی حەیاتا نەقدی جانم بێ بە کەف
زاهیدی خەڵوەت بە زاهیر مەنعی عیشقم لێ دەکا!
زاڵی دەورانیش، لەبەر پیری، بووە عەقڵی خەرەف!
ڕۆژی عوقبا گەر بەبێ تۆ جێم بەهەشت بێ، نامەوێ
بۆ فەریبم ڕاگرن غیلمان و حۆری، گەر بە سەف
شادمانیی دڵبەرە سالمناسناوی ئەدەبی! سەدایی شیوەنم
بۆ زیادیی زەوقی سالیک هاتووە ئاوازی دەف