چەرخە یە تۆنی ئەی مەیلە کەردی
لە کتێبی:
دیوانی مەولەوی
بەرهەمی:
مەولەوی (1806-1882)
2 خولەک
1044 بینین
چەرخە یە تۆنی ئەی مەیلە کەردی؟!
بەختە یە تۆنی شادی ئاوەردی؟!
خەمە فرسەتێ، ئامانەن زامان
دەردە مۆڵەتێ نامەی لەیل ئامان
تەحریری خوردەی ڕێحان بێزەکەت
تەقریری شیرین شەکەر ڕێزەکەت
یاوا وە سەروەخت خەستەی دەردەکەت
مەڵهەم دا نە زام دووری کەردەکەت
من کێنان خامەت وە یادم کەردەن
حوسنت زیاد بۆ پەی دڵان بەردەن
جەمینت هەر سات نە جەلایێ بۆ
هەر جەلا پەی من وە بەڵایێ بۆ
نیم نیگات ڕەفێق تیر ئەندازی بۆ
دڵەی من نیشان نە جانبازی بۆ
واتم مەیلی دڵ، پەی کەسێ کەسەن
جە تەنخوای سوحبەت زاهیری وەسەن
خەیاڵم کەفتەی ئاسانەکەی تۆن
چ حاجەت زاهیر ئاما و ئاموشۆن
دیام خەیر دووریت زۆرش ئاوەردەن
ئامانێ بەڵکم ئینە چەپگەردەن
هەر پاسە شادیش نییەن بەینەتش
بەڵ بێبەقا بۆ سزا و مەینەتش
سێر ساوون وە چەم ئەو پاڵای بێگەرد
چێش هەر زیاد کەرد دەرد وە بانی دەرد
وەشڵە وە مەینەت وەختی مەهجووری
سەد ڕەحمەت ئەو قەبر دووری و ڕەنجووری
ئەر سەد تۆی دەروون پەرێت قەقنەس بی،
یانەی دڵ وە یاد ئاوا بی بەس بی
ئیسە حەسرەتان، بیمی بەد ئەندێش
هەر یەک جە لایێ مەکێشۆم پەی وێش
خوسووس تۆ وەی ڕەنگ مەوینوون دڵگیر
چمان دەروونم مەپێکان وە تیر
دڵ خەریکی مەوج گێجاوی دەردەن
زوانم دایم ویردش ئەی فەردەن:
من نەبوون ئازیز گەردەن بلووری
کێن ڕەحمەت کەرۆ وەسڵش نە دووری
خاس بی ئەر سەد جار شادی وە باد بیم
دوورا و دوور وە دین ئاسانەش شاد بیم
ئیسە ها فەڵەک کەڵەک بەستەوە
تۆڕداوی دووریش ها وە دەستەوە
خەفەت وادەتەن، مەینەتان سا دەی
وەختی بارانەن ئەسرین دەی پەی کەی
ئازیزت ئاستەن ها وە دماوە
تەنە بۆ بێگیان سا شۆ وە ڕاوە