çerxe ye tonî ey meyle kerdî
From the Book:
Dîwanî Mewlewî
By:
Mawlawi Tawagozi (1806-1882)
2 minutes
1087 views
çerxe ye tonî ey meyle kerdî?!
bexte ye tonî şadî awerdî?!
xeme firsetê, amanen zaman
derde mołetê namey leyl aman
teḧrîrî xurdey řêḧan bêzeket
teqrîrî şîrîn şeker řêzeket
yawa we serwext xestey derdeket
mełhem da ne zam dûrî kerdeket
min kênan xamet we yadim kerden
ḧusinit zyad bo pey diłan berden
cemînit her sat ne celayê bo
her cela pey min we bełayê bo
nîm nîgat řefêq tîr endazî bo
diłey min nîşan ne canbazî bo
watim meylî dił, pey kesê kesen
ce tenxiway suḧbet zahîrî wesen
xeyałim keftey asanekey ton
çi ḧacet zahîr ama û amuşon
dyam xeyr dûrît zorş awerden
amanê bełkim îne çepgerden
her pase şadîş nîyen beynetiş
beł bêbeqa bo siza û meynetiş
sêr sawun we çem ew pałay bêgerd
çêş her zyad kerd derd we banî derd
weşłe we meynet wextî mehcûrî
sed řeḧmet ew qebir dûrî û řencûrî
er sed toy derûn perêt qeqnes bî,
yaney dił we yad awa bî bes bî
îse ḧesretan, bîmî bed endêş
her yek ce layê mekêşom pey wêş
xusûs to wey řeng mewînûn diłgîr
çiman derûnim mepêkan we tîr
dił xerîkî mewc gêcawî derden
zwanim daym wîrdiş ey ferden:
min nebûn azîz gerden bilûrî
kên řeḧmet kero wesiłş ne dûrî
xas bî er sed car şadî we bad bîm
dûra û dûr we dîn asaneş şad bîm
îse ha fełek kełek bestewe
tořdawî dûrîş ha we destewe
xefet wadeten, meynetan sa dey
wextî baranen esrîn dey pey key
azîzit asten ha we dimawe
tene bo bêgyan sa şo we řawe