çun wełg şadîy min way dûrîy leyl
From the Book:
Dîwanî Mewlewî
By:
Mawlawi Tawagozi (1806-1882)
2 minutes
1395 views
çun wełg şadîy min way dûrîy leyl
weyşûm berd ew herd new řiştey siweyl
gêcî ser kawan ce serdî bîn keyl
bo medan çun boy bêwefayî leyl
bêdes bî çinar zîz û] xatir řêş
beł xakêş kero we serda pey wêş
wîkoł wey wekoł pey zerdanî derd
masaw ne seraw řêzan herzan kerd
koç kerden xasan, çîhrey êłaxan
dawo we hemda dîsan ne daxan
roy ḧeşir dûrîy gerden bêgerdan
bêwade pîr kerd kawan ser herdan
hewr new zar zar kiław ew kiław
megêło, esrîn meřêzo we taw
maçî ewîş derd hîcranş werden
ya çun min bałay azîz gum kerden
wêney ’uqdey pêç řîşey erwa û dił
beste bo ce nim xûy mobet zengił
sîlsîley pêç pêç zułfî nazaran
zengiłe bestewe ce daney waran
qazan çun yaran awatexwazan
qetare besten mekeran řazan
bê leyl, ax amê, ce êłaxewe
pey ax dax tekdan be «ax dax»ewe
ceyranan gel gel taze kerden meyl
feř wisten ew zêd pay herdey duceyl
çem syawekey we naz dyakem
ser řewêłekey ce řem cya kem
hałay sermesten we şinoy leylax
boy new payîziş naman we demax
şemał şo hurker bider bêdreng
seyl û tem zerdîy dîde û dił û řeng
hûney seylî çem we şetawanda
temî dił we řûy zaxan kawanda
zerdîy řeng ne wełg newtûł nemaman
ta lêş malûm bo newpayîz aman
meperso bew meyl bêsamanewe
hay çi xeberen ce damanewe
waçe piř ce to ce wê feramoş
min dîm, to ḧałş nejnewî we goş
dîdeş yend xeyał bałat bî têşda
řagey xaw nebî buyero pêşda
yend gêłan bew derd ser ne derûnda
ba boy derd maro we řûy hamûnda
zayîfîş girew ce ka berdebê
bay henasey serd gêc pêş werdebê
gêc mewerd pûşiş bew henasewe
sirwey pûş mewat cerûy tasewe:
azîz şoxî şeng şîrîn tarenî
ahûy bê’ahûy weş řeftarenî
cełew cełew gel sipî tetaran
dînî dîdeket we çem midaran
êłaxan serden bazşan, aman
germesêr weşen borê we daman
ta gêran yaran ahwan řem řem
bacit we gerdin, xeracit we çem