hamin ha minwar germîş coş awerd
Li pirtûka:
Dîwanî Mewlewî
Berhema:
Mewlewî (1806-1882)
1 Xulek
616 Dîtin
hamin, ha, minwar, germîş coş awerd
fezay nezmî bezim newgułałan berd
bûł we yaney cem new gułałan şend
çemen bêneway nałey bułbuł mend
tay beřzayî şeng ne say muẍaran
şêwna çun zułf te’zîyedaran
ha, kawan, kawan dił çun diłřêşan
heř dan we serda herdan pey wêşan
durît ayr wist we yanekey min
yanê yaney dił wêranekey min
hewa ayrîn, serwext ayrîn
diłe ayrîn, bedbext ayrîn
wey gişt ayrewe xeyałim xamen
bextim napuxten famim nefamen
wey biłêsewe gerdêm baqîyen
wadey ayrîn badey saqîyen
beşqî pyałey mestî çaweket
bew peşêwî çîn pay kiławeket
ba bey mey bełkim ayrî mestî
soçno yekser xaşakî hestî