weş amay hey peyk lay qebîley leyl
Li pirtûka:
Dîwanî Mewlewî
Berhema:
Mewlewî (1806-1882)
2 Xulek
989 Dîtin
weş amay hey peyk lay qebîley leyl
ceybî dił we ’etir meylî leylê keyl
wextê dûy derdan mewyerd ne herdan
ce kûrey ayr derdî bêderdan
namey wêraney diłan pê awa
ce nakam yawa, bełam kam yawa
hay we ferqî dîn zamdaran tac day
şerî’etî meyl leylê řewac day
qat bî ce kesret yaranî hamdem
gerdî koy diłber xeber ber pey çem
mexmûr ker derûn ce badey baqî
yanê ney cwaw xatîmey saqî
bełê çun lezet tîrî nazaran
tam nedan ew dił bazît şumaran
nazûn wew ẍîret çi xas pêt zanan
maşełat we ḧał yaran pê wanan
heway kotayî nałey wêt bîyen
we tîrê henî agahît nîyen
dił nałan bîyen nałan pey tîren
tîr sermayey gyan ałemî pîren
kotayî nîyen dos we nałey dił
çun werdo ce gyan des diłey xecił
nîşan ew bo dił ne cay xedeng hûn
pey wizuErebî ḧewz ḧewz bido we bîrûn
ḧewzê ḧenefî xas pêş řeza bo
nek cey şer’eda nimat qeza bo
çun taze zamî hoşt wiyerden
wêt asa xeyał azîzit kerden
ew ce kon, dûrî û nizîkî ce kon
dûrî û nizîkî wesfî min û ton
menziłş nîyen ew qews ew xedeng
kê persaş yekê û sed hezar ferseng
yekêwen herwext nîşan amaden
kêşa û berşîye û ew nîşan daden
saqî zyadey mey zor awerden
siřî ser berden werne ser berden
tengezerfenan hîlakim meker
wîs’et meşrebî, ya cam nîmpeř der