وەش ئامای هەی پەیک لای قەبیلەی لەیل
لە کتێبی:
دیوانی مەولەوی
بەرهەمی:
مەولەوی (1806-1882)
2 خولەک
998 بینین
وەش ئامای هەی پەیک لای قەبیلەی لەیل
جەیبی دڵ وە عەتر مەیلی لەیلێ کەیل
وەختێ دووی دەردان مەویەرد نە هەردان
جە کوورەی ئایر دەردی بێدەردان
نامەی وێرانەی دڵان پێ ئاوا
جە ناکام یاوا، بەڵام کام یاوا
های وە فەرقی دین زامداران تاج دای
شەریعەتی مەیل لەیلێ ڕەواج دای
قات بی جە کەسرەت یارانی هامدەم
گەردی کۆی دڵبەر خەبەر بەر پەی چەم
مەخموور کەر دەروون جە بادەی باقی
یانێ نەی جواو خاتیمەی ساقی
بەڵێ چون لەزەت تیری نازاران
تام نەدان ئەو دڵ بازیت شوماران
نازوون وەو غیرەت چ خاس پێت زانان
ماشەڵات وە حاڵ یاران پێ وانان
هەوای کۆتایی ناڵەی وێت بییەن
وە تیرێ هەنی ئاگاهیت نییەن
دڵ ناڵان بییەن ناڵان پەی تیرەن
تیر سەرمایەی گیان ئاڵەمی پیرەن
کۆتایی نییەن دۆس وە ناڵەی دڵ
چون وەردۆ جە گیان دەس دڵەی خەجڵ
نیشان ئەو بۆ دڵ نە جای خەدەنگ هوون
پەی وضوعەرەبی حەوز حەوز بدۆ وە بیروون
حەوزێ حەنەفی خاس پێش ڕەزا بۆ
نەک جەی شەرعەدا نمات قەزا بۆ
چون تازە زامی هۆشت ویەردەن
وێت ئاسا خەیاڵ ئازیزت کەردەن
ئەو جە کۆن، دووری و نزیکی جە کۆن
دووری و نزیکی وەسفی من و تۆن
مەنزڵش نییەن ئەو قەوس ئەو خەدەنگ
کێ پەرساش یەکێ و سەد هەزار فەرسەنگ
یەکێوەن هەروەخت نیشان ئامادەن
کێشا و بەرشییە و ئەو نیشان دادەن
ساقی زیادەی مەی زۆر ئاوەردەن
سڕی سەر بەردەن وەرنە سەر بەردەن
تەنگەزەرفەنان هیلاکم مەکەر
ویسعەت مەشرەبی، یا جام نیمپەڕ دەر