wadey seferen hay nesîm aman
Li pirtûka:
Dîwanî Mewlewî
Berhema:
Mewlewî (1806-1882)
1 Xulek
743 Dîtin
wadey seferen, hay nesîm aman
we lay azîza buyer çûn caran
teqrîr ker eweł bew zwanî ḧał
selam û du’ay ew duřdaney lał
duwem ce ḧałat peşêwî ḧałim
ce şorîy bext û wêranîy małim
ce bêqerarî, ce desî dûrî
ce bê’aramî, ce na sebûrî
ce sozey şerar na’îrey hîcran
ce nasorîy zam tîrekey mujgan
ce qirçey qawey cergî cefakêş
ce welweley derd derûnî piř êş
ce kizey hûnaw ne çem serkerdem
ce sengînîy bar qamet xem werdem
ce bêxawîy şew elweday seḧer
ce nałey e’za, ce sozey ciger
ce hawarî ten, ce elweday gyan
ce yaway fełek nałey «el’eman»
yekyek be ḧuzûr ew řoḧî řewan
’erz ker we sed şîrînîy zwan
waçe yend zuxaw derûnş werden
espabî merden amade kerden
beł yawo we lam tebîbî derdim
merhem do ne řûy zamanî serdim
cew me’cûn eczay lutif û meylî wêş
dewa do pey zam xestekey dił řêş