wadey sifîdî şikofey pîrîn
Li pirtûka:
Dîwanî Mewlewî
Berhema:
Mewlewî (1806-1882)
2 Xulek
1278 Dîtin
wadey sifîdî şikofey pîrîn
şikofey baxçey pîrî diłgîrîn
şikofey baxçey pîrî sifîden
sermayey mîwey ’îrfan her êden
ne baxçey sunbuł tarî mûy tarda
sipî şikofey pîrîm dyar da
baqey zwêrî û zarî û diłgîrîm
peypey zyad kerd pejarey pîrîm
axiriřoy wehar newciwanîmen
ewełřoy payîz zîndeganîmen
henasem çun bay xezan mexêzo
peypey bergî şax şadîm meřêzo
xedengî bałam çeman keman werd
řast we nîşaney fena řû awerd
kemkem pîrî xem we qamet mido
demdem we’dey řoy qyamet mido
pîrî yekser zor ce zanûm senden
ser we gerdinda her we zor menden
saqî, pam bestey zincîrî pîrîn
desim damanit wadey desgîrîn
çabuk bew řeftar bêdrengewe
xeraman bew naz bałay şengewe
camit cemKes asa lebřêz ker ce mey
pêm noşker we yad bezmi’aray keyKes
mestî we pîran cwanî mido
hêzî dûbarey ziranî mido
pêmder ta peypey pêwe hey kerûn
ray sextî saray meḧşer tey kerûn
ziringey goşî wêm pêm maço we taw:
gahê xeberdar, gahê serḧesaw
min pemey ẍefłet keř kerden goşim
hîç wekes nîyen ne goş ne hoşim
ney guzergay teng bazarî çepgerd
her katê zanay ecel simko kerd
mutrîb bew neẍmey «şanazî»tewe
ya bew perdey pak ḧîcazîNava taybettewe
bułendiker diłsoz seday diłtengî
bełkem bêdar bû cey xawî sengî
hay ẍefłet takey ham sefer wiyerd
bêdar ber ce xaw karwan wiyerd